11 февраль куни Тошкент шаҳрининг Сергели туманида розеткада қолиб кетган қувватлантиргич оқибатида ёнғин чиқди. Бу ҳақда «Менинг юртим» телеканалининг «Марказий студия» дастурига маълум қилинди.
Маълум қилинишича, Сергели тумани ИИО ФМБ 2-сонли ички ишлар бўлимига қарашли «Қипчоқ» маҳалласи ҳудудига бириктирилган профилактика катта инспектори капитан Жамшид Тошкентбоев ёрдамчиси билан ҳудудни кўздан кечириб чиқаётган бўлган.
Кутилмаганда маҳалланинг 13-уйида яшовчи фуқаролардан бири уларга қўнғироқ қилиб, 58-хонадонда ёнғин бўлаётганини билдирган. Воқеа жойига етиб борган инспекторлар хонадон ичида 68 ёшли фуқаро қолиб кетганидан хабар топган.
Инспекторлар ёнаётган уй ичига кириб бориб, фуқарони хавфсиз жойга олиб чиқишга муваффақ бўлган.
Аниқланишича, ёнғин розеткада қолиб кетган қувватлантиргичда юзага келган қисқа туташув оқибатида келиб чиққан. Эриган қувватлантиргич гилам устига тушиб, ёнғинни юзага келтирган.
Бундан аввал Олтиариқдаги массажхонада, Зарафшон миллий боғида, Самарқанддаги ошхоналардан бирида ёнғин содир бўлгани ҳақида хабар берилганди. Мавзуга доир:
