Ўзбекистонга октябрь ойида жами 1,5 млн долларга 55 та электромобил импорт қилинди

Ўзбекистонга 2021 йилнинг октябрь ойида хориждан 55 та электромобил импорт қилинган. Бу ҳақда Давлат статистика қўмитаси маълум қилди.

Қайд этиш керакки, бу кўрсаткич 2021 йилнинг сентябрь ойига нисбатан 2 тага кам. Ўзбекистонда октябрь ойидаги электромобиллар хариди учун 1,5 миллион доллар сарфланган.

Аввалроқ Бухорода Жанубий Корея билан ҳамкорликда электромобил ишлаб чиқарувчи завод йўлга қўйилиши режалаштирилаётгани тўғрисида хабар берилганди. Маълум бўлишича, лойиҳа қиймати 1 миллиард 210 миллион долларга тенг, йилига 30 минг дона электромобил ишлаб чиқариш кўзда тутилган. Мавзуга доир:

• Ўзбекистонда электромобиллар учун алоҳида давлат рақами бериш бошланди
• Фарғонада дастлабки электромобиллар 2021 йил декабрь ойида тест режимида ишлаб чиқарилади

Эслатиб ўтамиз, «Ўзавтосаноат» компанияси электромобиллар устида иш олиб бораётгани илк бор 2018 йил май ойида маълум бўлган эди. Компаниянинг ўша вақтдаги раҳбари Умиджон Салимов «яқин икки ой ичида электромобилларни ишлаб чиқаришни ташкил этиш бўйича республика концепцияси ишлаб чиқилиши»ни билдирган эди. 2020 йилнинг ноябрида эса «Ўзавтосаноат»нинг Р&Д маркази муҳандислари «ярим йил ичида» нархи 10 минг доллар атрофида бўладиган, бир марта тўлиқ қувватлантирилгач, 150 километр йўл боса оладиган Лабо электромобиллари ишлаб чиқарилиши мумкинлигини маълум қилган эди.

Ўзбекистон ҳукуматининг 2020 йил 29 декабрдаги қарорида «Ўзавтосаноат»ни фақат электродвигателда ҳаракатланувчи енгил автомобиллар ва мототранспорт воситалари ишлаб чиқаришга ўтказиш мақсади ошкор этилган эди. Қарор доирасида компанияга 1 февралга қадар лойиҳа концепциясини ишлаб чиқиш учун хорижий эксперт ва консалтинг компанияларини жалб этиш ҳақида топшириқ берилган эди. Айни вақтда расмийлар 2021 йил охиригача Тошкентдаги барча ёнилғи қуйиш шохобчаларида электромобилларни қувватлантириш имконияти пайдо бўлиши ҳақида баёнот берган.