Қашқадарё вилоятининг Қарши шаҳрида яна бир автомобиль — ҳаракатланиб кетаётган Lacetti’да ёнғин чиқди, дея хабар берди «Дарё» мухбири.
Воқеани аниқлаштирган вилоят Фавқулодда вазиятлар бошқармаси ахборот хизмати раҳбари Соҳиб Ваитов Қарши шаҳар фавқулодда вазиятлар бўлимига ёнғин ҳақида соат 20:33 да хабар берилганини маълум қилди.
«Воқеа жойига Қарши шаҳар фавқулодда вазиятлар бўлими 2-ёнғин-қутқарув қисмидан 1 та бўлинма соат 20:35 да етиб бориб, тахминан, соат 20:41 да ёнғин тўлиқ ўчирилди. Ёнғин оқибатида Lacetti русумли автомобиль зарар кўрган. Моддий зарар миқдори аниқланмоқда. Ёнғин натижасидан ҳеч ким тан жароҳати олмаганлиги маълум бўлди», — дейди Соҳиб Ваитов.
Соҳиб Ваитовнинг қўшимча қилишича, автомобиль эгаси ва унга кўмаклашган кишилар ёнғин ҳақида тезда хабар бермай, воқеа жойига келиб қолган водовоздан фойдаланиб, ёнғинни ўчиришга ҳаракат қилган. Ва ёнғиннинг кучайиб кетишига сабабчи бўлган.
Эслатиб ўтамиз, аввалроқ ҳам Қаршида юриб кетаётган Nexia, шунингдек, светофорнинг қизил чироғида тўхтаб турган Isuzu’га урилган Nexia-2 ёниб кетгани ҳақида хабар берилганди.Мавузга доир: Тошкентда тўхтаб турган Lacetti ёниб кетди (фото)
