Tesla kompaniyasining Xitoydagi bo‘limi Model Y krossoverining yangilangan versiyasini ishlab chiqara boshladi, deb xabar bermoqda Kolesa.kz nashri.
Yangi krossover Model YL deb nomlanadi va avvalgisidan uzun kuzov borligi hamda uchinchi qatorda ham o‘rindiqlar joylashgani bilan farq qiladi. Avtomobil ikki dvigatelli elektr uzatmaga ega bo‘lib, boshlang‘ich narxi 339 ming yuan (taxminan 47 ming AQSH dollari) ni tashkil qiladi.
O‘lchamlar
Tesla Model YL uzunligi — 4976 mm, eni — 1920 mm, balandligi — 1668 mm, g‘ildirak bazasi esa 3040 mm. Oddiy Model Y bilan solishtirganda, 150 mm ga uzaygan. Tashqi ko‘rinishda jiddiy o‘zgarishlar yo‘q: faqat tom qismi dizayni biroz o‘zgartirilgan va yangi spoyler qo‘shilgan.
Salon
Tesla Model YL saloni uch qator bo‘lib, har bir qatorda ikkita o‘rindiq joylashgan. O‘rindiqlar yangilangan konstruksiyaga ega: ikkinchi va uchinchi qatorda stakan qo‘yadigan joylar, smartfonni zaryadlash portlari mavjud. Multimediya tizimi ekrani 16 dyuymni tashkil qiladi. Shuningdek, qo‘shimcha xavfsizlik yostiqchalari ham o‘rnatilgan.
Texnik ko‘rsatkichlar
Model YL oldingi dvigatel quvvati — 193 ot kuchi, orqadagi dvigatel esa — 269 ot kuchiga ega. Bu mashinaga 100 km/soat tezlikka 4,5 soniyada chiqishni ta’minlaydi.
Xitoy matbuoti ma’lumotlariga ko‘ra, Tesla allaqachon yangi elektromobillarni mahalliy shourumlarga yetkaza boshlagan. Dastlabki xaridorlarga avtomobillar sentyabr oyida topshiriladi.
Izoh (0)