Tesla компаниясининг Хитойдаги бўлими Model Y кроссоверининг янгиланган версиясини ишлаб чиқара бошлади, деб хабар бермоқда Колеса.кз нашри.
Янги кроссовер Model YL деб номланади ва аввалгисидан узун кузов борлиги ҳамда учинчи қаторда ҳам ўриндиқлар жойлашгани билан фарқ қилади. Автомобиль икки двигателли электр узатмага эга бўлиб, бошланғич нархи 339 минг юан (тахминан 47 минг АҚШ доллари) ни ташкил қилади.
Ўлчамлар
Tesla Model YL узунлиги — 4976 мм, эни — 1920 мм, баландлиги — 1668 мм, ғилдирак базаси эса 3040 мм. Оддий Model Y билан солиштирганда, 150 мм га узайган. Ташқи кўринишда жиддий ўзгаришлар йўқ: фақат том қисми дизайни бир оз ўзгартирилган ва янги спойлер қўшилган.
Салон
Tesla Model YL салони уч қатор бўлиб, ҳар бир қаторда иккита ўриндиқ жойлашган. Ўриндиқлар янгиланган конструкцияга эга: иккинчи ва учинчи қаторда стакан қўядиган жойлар, смартфонни зарядлаш портлари мавжуд. Мултимедия тизими экрани 16 дюймни ташкил қилади. Шунингдек, қўшимча хавфсизлик ёстиқчалари ҳам ўрнатилган.
Техник кўрсаткичлар
Model YL олдинги двигатель қуввати — 193 от кучи, орқадаги двигатель эса — 269 от кучига эга. Бу машинага 100 км/соат тезликка 4,5 сонияда чиқишни таъминлайди.
Хитой матбуоти маълумотларига кўра, Tesla аллақачон янги электромобилларни маҳаллий шоурумларга етказа бошлаган. Дастлабки харидорларга автомобиллар сентябрь ойида топширилади.
Изоҳ (0)