Qo‘shma Shtatlarning birinchi xonimi Melaniya Tramp Rossiya prezidenti Vladimir Putinga maktub yo‘lladi. Fox News e’lon qilgan xat matnidan anglashilishicha, u Kreml rahbaridan ukrainalik bolalarni himoya qilishni so‘ragan.
AQSH birinchi xonimi, shuningdek, “dunyoning qayerida tug‘ilishidan qat’i nazar, barcha bolalar muhabbat, imkoniyat va xavfsizlik haqida orzu qilishi”ni ta’kidlagan.
“Janob Putin, siz ularning yuziga tabassumni qaytarishingiz mumkin. Begunoh bolalarni himoya qilish insoniyat uchun xizmatdir. Siz bu ishni bugunoq amalga oshira olasiz”, deb yozgan Donald Trampning rafiqasi.
Reuters’ning yozishicha, avvaliga maktubning mavjudligi ham noma’lum bo‘lgan. Keyinroq esa unda Ukrainadan majburan ko‘chirilgan bolalar haqida so‘z borgani oydinlashgan.
Ukrainadan olib ketilgan bolalar
Xalqaro jinoiy sud (ICC) ukrainalik bolalarning Rossiyaga majburan olib ketilishi bo‘yicha ish ochib, Vladimir Putin va RF bolalar huquqlari bo‘yicha vakili Mariya Lvova-Belovaga nisbatan hibsga olish orderi chiqargan edi.
Ma’lumotlarga ko‘ra, Rossiya kuchlari 2022-yil fevralidan buyon 19 mingdan ortiq ukrainalik bolani olib ketgan. Ularning mingdan ziyodi qaytarib berilgan.
Izoh (0)