Fransiya prezidenti Emmanuel Makron Ukrainaga xorijiy qo‘shinlarni joylashtirish g‘oyasini qo‘llab-quvvatladi. Siyosatchi yuborilishi kutilayotgan harbiylar sonini ochiqladi. Bu haqda u Le Parisien nashriga bergan intervyusida aytib o‘tdi.
Makronning so‘zlariga ko‘ra, Ukrainaga xorijiy qo‘shinlar Rossiya bilan harbiy harakatlar to‘xtatilgandan keyin yuboriladi. Bu vaziyatni barqarorlashtirish uchun zarurdir.
Shuni tushunish kerakki, avtoritet songa bog‘liq emas. Bugungi kunda Yevropadagi eng katta armiya Ukraina armiyasi bo‘lib, unga bir million askar safarbar qilingan. Boshqa hech bir qo‘shin bunchalik ko‘p odamni to‘play olmaydi. Asosiysi, Ukrainada qo‘shinlar bor, dedi u.
Fransiya prezidenti kelajakda Ukrainada joylashtirilishi mumkin bo‘lgan xorijiy harbiylar soni haqidagi savolga shunday javob berdi:
Bu bir necha ming bo‘lishi mumkin, lekin bir necha yuz ming emas…Gap miqdorda emas. Gap shundaki, biz u yerda ikkinchi mudofaa chizig‘i kabi havoda yoki front chizig‘idan uzoqda joylashgan strategik nuqtalarda qo‘llab-quvvatlashni ta’minlash uchun bo‘lamiz. Eng avvalo, birdamlikni namoyish etish uchun o‘sha yerda bo‘lamiz, deya ta’kidladi Makron.
30 ga yaqin davlatni birlashtirgan “ko‘ngillilar koalitsiyasi”ning olti davlati tinchlikparvarlik missiyasi doirasida Ukrainada o‘z qo‘shinlarini joylashtirishga tayyorligi haqida xabar berilgandi. Ular qatorida Fransiya, Britaniya va Boltiqbo‘yi davlatlari bor. Rossiya Ukrainaga xorijiy harbiylar joylashtirilishiga qarshilik qilib kelmoqda.
Izoh (0)