Ўзбекистонда иш ҳақи, пенсия ва нафақалар учун йиллик тўлов миқдори маълум қилинди

Мамлакатда 2023 йилда давлат бюджетидан иш ҳақи, пенсия ва нафақалар учун қанча маблағ сарфлангани очиқланди. 

Иқтисодиёт ва молия вазирлиги ахборотига кўра, ўтган йили иш ҳақи ва пенсия учун тўловлар миқдори 2022 йилдагидан сезиларли ортган. Хусусан, давлат ташкилотларида ишловчи ходимлар иш ҳақи учун бюджетдан жами 93 триллион сўм тўлаб берилган. 2022 йилда бу рақам 78,9 триллион сўм бўлган.

2023 йилда фуқароларнинг барча турдаги пенсиялари учун 53 триллион 596 миллиард сўм йўналтирилган. Таққослаш учун, 2022 йилдаги жами кўрсаткич 44,9 триллион сўмни ташкил этган.

Давлат бюджети ҳисобидан ижтимоий нафақалар учун йил давомида 21,7 триллион сўм сарфланган. 2022 йилда бу йўналишга 20,3 триллион сўм ажратилган.

Маълумот учун, ҳозирда давлат ташкилотларида 2 миллион 478 минг нафардан ортиқ ходим ишлайди. Мамлакатда пенсия олувчилар сони 4 миллион нафарга етган. Нафақа ва моддий ёрдам олувчилар эса 2 миллион 471 минг 900 нафарни ташкил этади.