Ўзбекистонда 68 нафар боланинг ўлими ва 16 нафар боланинг ногирон бўлиб қолишига сабаб бўлган “Док-1 Макс” иши бўйича яна суд мажлиси бошлангани, дастлабки ҳукмдан норозилар судга апелляция киритгани ҳақида хабар берилганди. Судья Музаффар Аҳмедов раислигидаги судлов ҳайъати томонидан кўриб чиқилаётган суд 5 апрель куни 15 апрелга қадар танаффус эълон қилганди. Бугун давом этган иккинчи суд мажлиси ҳам адвокатлардан бирининг келмагани боис яна қолдирилди.
Суд аввалида сўз олган судья Музаффар Аҳмедов танаффусдан олдин адвокатлар билан ҳафтанинг ҳар душанба куни мазкур ишни кўриб чиқишга келишилганини, шу сабаб суднинг барча иштирокчилари мажлислар тайинланган куни соат 10:30 дан кеч қолмаган ҳолда, суд залида бўлишлари кераклигини эслатди. Ва ҳиндистонлик судланувчи С.Р.П.нинг адвокати Даврон Аҳмадовга бу бўйича муносабат билдирилишини маълум қилди.
Аниқланишича, 20 йил муддатга озодликдан маҳрум қилинган С.Р.П., 18 йил муддатга озодликдан маҳрум қилинган Сардор Кариев ва унинг ҳар бири 16 йил муддатга қамалган ўринбосарлари — А.Азимов ва Н.Мусаевлар, 16,6 йилга озодликдан маҳрум этилган Ш.Шодманов ҳамда 2 йил муддатга озодлиги чекланган Ш.Абдуғаниев ва И.Мирзаёқубовлар суднинг дастлабки ҳукмидан норози бўлган. Ва судга апелляция киритган.
Суд 22 апрель куни соат 10:30 га қадар танаффус эълон қилди.
Изоҳ (0)