O‘zbekistonda 68 nafar bolaning o‘limi va 16 nafar bolaning nogiron bo‘lib qolishiga sabab bo‘lgan “Dok-1 Maks” ishi bo‘yicha yana sud majlisi boshlangani, dastlabki hukmdan norozilar sudga apellyatsiya kiritgani haqida xabar berilgandi. Sudya Muzaffar Ahmedov raisligidagi sudlov hay’ati tomonidan ko‘rib chiqilayotgan sud 5-aprel kuni 15-aprelga qadar tanaffus e’lon qilgandi. Bugun davom etgan ikkinchi sud majlisi ham advokatlardan birining kelmagani bois yana qoldirildi.
Sud avvalida so‘z olgan sudya Muzaffar Ahmedov tanaffusdan oldin advokatlar bilan haftaning har dushanba kuni mazkur ishni ko‘rib chiqishga kelishilganini, shu sabab sudning barcha ishtirokchilari majlislar tayinlangan kuni soat 10:30 dan kech qolmagan holda, sud zalida bo‘lishlari kerakligini eslatdi. Va hindistonlik sudlanuvchi S.R.P.ning advokati Davron Ahmadovga bu bo‘yicha munosabat bildirilishini ma’lum qildi.
Aniqlanishicha, 20 yil muddatga ozodlikdan mahrum qilingan S.R.P., 18 yil muddatga ozodlikdan mahrum qilingan Sardor Kariyev va uning har biri 16 yil muddatga qamalgan o‘rinbosarlari — A.Azimov va N.Musayevlar, 16,6 yilga ozodlikdan mahrum etilgan Sh.Shodmanov hamda 2 yil muddatga ozodligi cheklangan Sh.Abdug‘aniyev va I.Mirzayoqubovlar sudning dastlabki hukmidan norozi bo‘lgan. Va sudga apellyatsiya kiritgan.
Sud 22-aprel kuni soat 10:30 ga qadar tanaffus e’lon qildi.
Izoh (0)