Жанубий Корея президенти Ли Же Мёнг 15 август куни Шимолий Корея сиёсий тизимини ҳурмат қилишга ва ҳарбий ишончни мустаҳкамлашга ваъда берди. Бу ҳақда Al Arabiya хабар берди.
Ли Же Мёнг ушбу гапларни япон мустамлакасидан озодлик байрами муносабати билан ўтказилган тадбирда сўзлаган. У, июнь ойида президент этиб сайланганидан бери, ядровий қуролга эга Шимол билан шартсиз мулоқот ўрнатиш ниятида эканини билдирмоқда. Бу уни аввалги кескин сиёсат юритган президентдан яққол ажратиб турибди.
“Жанубий Корея ҳукумати кескинликни камайтириш ва ўзаро ишончни тиклаш учун изчил чоралар кўради. Сеулнинг Шимолга қарши душманона ҳаракатлар қилиш нияти йўқ. Пхеньянни мулоқотни қайта тиклашга чақираман”, деган президент.
Бироқ президент бу гапларни Шимолий Корея етакчисининг синглиси Ким Ё Жонг Жануб билан алоқаларни яхшилаш нияти йўқлигини билдирганидан бир неча кун ўтиб айтмоқда. Хусусан Ё Жонг шундай деган эди:
“Сеул қандай сиёсат юритишидан ва қандай таклифлар киритишидан қатъий назар, биз улар билан қизиқмаймиз. Жанубий Корея билан учрашишга ҳам, гаплашишга ҳам ҳеч қандай сабаб йўқ”.
Шунингдек, Ё Жонг Шимолий Корея ташвиқот радиокарнайларини олиб ташлаётгани ҳақидаги хабарларни рад этган. Жануб ҳарбийлари эса июнь ойида икки давлат демилитаризация қилинган ҳудуд бўйлаб ташвиқот эшиттиришларини тўхтатганини, ўтган ҳафта чегарада Шимолий Корея қўшинлари радиокарнайларни демонтаж қилаётганини аниқлаганди.
Изоҳ (0)