Исроил армияси Ғазо шаҳрини эгаллаш режаси доирасида қуруқликдаги дастлабки ҳужумларни бошлади. Ҳозирда ҳарбий кучлар шаҳарнинг чекка ҳудудларини назорат қилмоқда. Бу ҳақда BBC хабар берди.

Ҳарбийлар Зайтун ва Жабалия ҳудудларида ҳаракатга киришиб, кенг миқёсдаги ҳужумларга тайёргарлик кўрмоқда. Сентябрь ойида 60 минг захира аскар сафарбар қилиниши режалаштирилган, бу эса секторда фаол ҳарбий хизматчилар сонини кўпайтиришга ва операцияларни осонлаштиришга имкон беради.
Исроил мудофаа кучлари матбуот котиби бригада генерали Эффи Дефрин 20 август куни бўлиб ўтган йиғилишда шундай баёнот берди:
“Биз террорчилик ташкилоти бўлган ҲАМАСга етказилаётган зарарни янада кўпайтирамиз. Шунингдек, аҳолининг ҲАМАСга қарамлигига барҳам берамиз. Биз секторда аллақачон дастлабки ҳаракатларни бошладик”.
Фаластиннинг ҲАМАС гуруҳи Исроилни “бегуноҳ аҳоли устида шафқатсиз урушни давом эттиришда” айбламоқда. Шу боис Ғазо шаҳридаги юз минглаб аҳоли эвакуация қилиниб, жанубий ҳудудлардаги бошпаналарга йўналтирилиши кутилмоқда.
Кўплаб халқаро ташкилот ва давлатлар Исроилнинг режаларини қоралаб чиққан. Хусусан, Франция президенти Эммануэл Макрон 20 август куни бу ҳаракат иккала халқ учун фалокат келтириши ва бутун минтақани доимий уруш ўчоғига айлантириши мумкинлигини айтган. Халқаро Қизил Хоч қўмитаси эса ҳарбий операциялар кучайиши аҳоли ва гаровдагилар учун фалокатли оқибатларга олиб келишини билдирмоқда.
Исроил ҳукумати дастлаб июль ойида ҲАМАС билан тинчлик ва асирларни озод қилиш бўйича музокаралар муваффақиятсиз тугагач, Ғазони тўлиқ эгаллаш ниятини эълон қилганди.
Маълумот ўрнида, секторда 2023 йил 7 октябрда уруш бошланганидан бери камида 62 минг киши ҳалок бўлган, 251 киши эса гаровга олинган. Исроил Мудофаа кучлари ҲАМАСни заифлаштириш ва террор инфратузилмасига зарар етказишни мақсад қилганини айтмоқда. Яҳудий армиясининг таъкидлашича, Ғазо шаҳридаги аҳоли олдиндан огоҳлантирилиб, эвакуация қилинмоқда. Шунингдек, Исроил ҳукумати гаровдагиларни ҳимоя қилиш учун барча чораларни кўрмоқда.
Изоҳ (0)