Isroil G‘azo shahrini to‘liq egallashga kirishdi: 60 ming zaxira askar safarbar qilinmoqda (video)

Isroil armiyasi G‘azo shahrini egallash rejasi doirasida quruqlikdagi dastlabki hujumlarni boshladi. Hozirda harbiy kuchlar shaharning chekka hududlarini nazorat qilmoqda. Bu haqda BBC xabar berdi.

Harbiylar Zaytun va Jabaliya hududlarida harakatga kirishib, keng miqyosdagi hujumlarga tayyorgarlik ko‘rmoqda. Sentyabr oyida 60 ming zaxira askar safarbar qilinishi rejalashtirilgan, bu esa sektorda faol harbiy xizmatchilar sonini ko‘paytirishga va operatsiyalarni osonlashtirishga imkon beradi.

Isroil mudofaa kuchlari matbuot kotibi brigada generali Effi Defrin 20-avgust kuni bo‘lib o‘tgan yig‘ilishda shunday bayonot berdi:

“Biz terrorchilik tashkiloti bo‘lgan HAMASga yetkazilayotgan zararni yanada ko‘paytiramiz. Shuningdek, aholining HAMASga qaramligiga barham beramiz. Biz sektorda allaqachon dastlabki harakatlarni boshladik”.

Falastinning HAMAS guruhi Isroilni “begunoh aholi ustida shafqatsiz urushni davom ettirishda” ayblamoqda. Shu bois G‘azo shahridagi yuz minglab aholi evakuatsiya qilinib, janubiy hududlardagi boshpanalarga yo‘naltirilishi kutilmoqda.

Ko‘plab xalqaro tashkilot va davlatlar Isroilning rejalarini qoralab chiqqan. Xususan, Fransiya prezidenti Emmanuel Makron 20-avgust kuni bu harakat ikkala xalq uchun falokat keltirishi va butun mintaqani doimiy urush o‘chog‘iga aylantirishi mumkinligini aytgan. Xalqaro Qizil Xoch qo‘mitasi esa harbiy operatsiyalar kuchayishi aholi va garovdagilar uchun falokatli oqibatlarga olib kelishini bildirmoqda.

Isroil hukumati dastlab iyul oyida HAMAS bilan tinchlik va asirlarni ozod qilish bo‘yicha muzokaralar muvaffaqiyatsiz tugagach, G‘azoni to‘liq egallash niyatini e’lon qilgandi.

Ma’lumot o‘rnida, sektorda 2023-yil 7-oktyabrda urush boshlanganidan beri kamida 62 ming kishi halok bo‘lgan, 251 kishi esa garovga olingan. Isroil Mudofaa kuchlari HAMASni zaiflashtirish va terror infratuzilmasiga zarar yetkazishni maqsad qilganini aytmoqda. Yahudiy armiyasining ta’kidlashicha, G‘azo shahridagi aholi oldindan ogohlantirilib, evakuatsiya qilinmoqda. Shuningdek, Isroil hukumati garovdagilarni himoya qilish uchun barcha choralarni ko‘rmoqda.