Ўзбекистонда бир неча марта сайлов бюллетенини берганлик учун жавобгарлик белгиланди, деб хабар бермоқда Адлия вазирлиги.
Маълум қилинишича, президент томонидан имзоланган қонун билан айрим қонун ҳужжатларига ўзгартиришлар ва қўшимча киритилди. Маъмурий жавобгарлик тўғрисидаги кодексига киритилган ўзгартиришга кўра, сайлов комиссиясининг ёки референдум ўтказувчи комиссиянинг аъзоси томонидан фуқарога бир неча марта ёки бошқа шахслар номидан овоз бериш учун сайлов (овоз бериш) бюллетенини берганлик учун жавобгарлик белгиланди.
Шунингдек, сиёсий партияларга сайловда иштирок этиш учун ажратилган давлат маблағлари бўйича Марказий сайлов комиссиясига оралиқ ёки якуний ҳисоботни тақдим этмаганлик ёки ўз вақтида тақдим этмаганлик ёхуд ҳисоботда била туриб нотўғри маълумотларни тақдим этганлик учун маъмурий жавобгарликни назарда тутувчи қўшимча киритилди.
Қонун расмий эълон қилинган кундан эътиборан кучга киради.
Эслатиб ўтамиз, 27 октябрь куни Ўзбекистонда Қонунчилик палатаси ва маҳаллий Кенгашларга сайловлар бўлиб ўтади.
Изоҳ (0)