Пекин шаҳрида Хитой—Қирғизистон—Ўзбекистон темирйўли қурилиши бўйича стратегик лойиҳани амалга ошириш тўғрисидаги битимни имзолаш маросими бўлиб ўтди. Бу ҳақда Президент матбуот котиби хабар берди.
Шавкат Мирзиёев тадбир иштирокчиларига видеомурожаат йўллади. Битимнинг имзоланиш маросими муносабати билан Хитой халқ раиси Си Цзиньпин ва Қирғизистон президенти Садир Жапаров ҳам ўз мурожаатларини йўллади.
Давлат раҳбари ушбу муҳим инфратузилма лойиҳасини амалга ошириш бошланаётгани кенг минтақада иқтисодий ва транспорт жиҳатидан боғлиқликни кучайтиришга қаратилган тарихий воқеа эканини алоҳида таъкидлади.
“Мазкур темирйўл Хитойни минтақамиз билан боғловчи энг қисқа қуруқлик йўлига айланади. Келгусида ушбу йўл бизнинг мамлакатларимизга истиқболли трансафғон йўлаги орқали Жанубий Осиё ва Яқин Шарқ давлатларининг кенг бозорларига чиқиш имконини беради”, — деди президент.
Лойиҳанинг амалга оширилиши оқибатида вужудга келадиган иқтисодий самара янги корхоналар ва ўн минглаб иш ўринлари яратилиши, ўзаро савдо ҳажми каррасига ошиши, саноат кооперацияси кенгайиши, инвестициявий жозибадорлик ўсиши ва энг муҳими — аҳоли турмуш даражаси ошишида намоён бўлади. Битимга мувофиқ, Хитой—Қирғизистон—Ўзбекистон темирйўли Қашғар—Торугарт—Макмал—Жалолобод—Андижон йўналиши бўйлаб ўтади.
Мутахассисларнинг қайд этишича, юк ташиш йиллик ҳажми 15 миллион тоннагача етиши мумкин, товарларни якуний истеъмолчиларга етказиш муддати эса 7 кунга қисқаради. Бундан ташқари, замонавий транзит ва логистика инфратузилмаси, омборхоналар ва терминаллар яратилади.
Изоҳ (0)