Наманган вилоятининг Мингбулоқ туманидаги фермер хўжаликларидан бирининг раҳбари узоқ йиллардан бери ишлаб келаётган механизаторига автомобиль совға қилди. Бу ҳақда “Дарё” мухбири Азизбек Абдувалиев хабар бермоқда.
Баҳодир Чилматов раҳбар бўлган “Файзимуҳаммад ота Ч” фермер хўжалигида 747 гектар майдонда пахта, ғалла ва бошқа экинлар етиштириб келинади. Хўжаликнинг турли русумдаги 24 та қишлоқ хўжалиги техникаси бор.
Улардан бирини механизатор Собиржон Эргашев 20 йилдан бери бошқариб келаётган эди. Фермер ўз ходимига Onix автомобилини совға қилишга қарор қилди. Совғани туманда дала ишларининг бориши билан танишаётган вилоят ҳокими Шавкат Абдураззоқов топширди.
“Фермерларимиз орасида бу ўзига хос анъанага айланиб боряпти. Олдинроқ учқўрғонлик донгдор фермеримиз Гулхумор опа механизаторларига Damas автомобиллари олиб бериб, умра зиёратларига жўнатганлари ҳақида эшитгандим. Бу хайрли иш энди Мингбулоқда амалга ошаётган экан, автомобиль эгасига буюриб насиб эцин”, — деди Шавкат Абдураззоқов.
Собиржон Эргашев 54 ёшда, уч фарзанднинг отаси, тўрт набиранинг бобоси. Айтишича, шу пайтгача оиласида шахсий автомобиль бўлмаган. Механизатор Onix машинасини миниб келгани у истиқомат қиладиган “Қўғоликўл” маҳалласида байрамга айланиб кетди.
Изоҳ (0)