Украина тарихда биринчи марта Озарбайжондан газ харид қилди. Бу ҳақда мамлакатнинг “Нафтогаз” компанияси раҳбари Серҳий Корецкийга асосланиб, “Ведомости” хабар берди.
Корецкийнинг айтишича, газ етказиб бериш SOCАR Energy Ukraine компанияси билан тузилган келишув асосида амалга оширилган. Озарбайжон газининг Украинага етказилиши Транс—Балкан йўлаги орқали — Болгария ва Руминия ҳудудларидан ўтиб амалга оширилади.
“Бу ҳажм жиҳатдан кичик бўлса-да, стратегик аҳамиятга эга илк қадам бўлиб, узоқ муддатли ҳамкорлик учун йўл очади”, деган Корецкий Facebook’даги саҳифасида.
Маълумот учун, 2024 йил 1 январдан бошлаб Украина Россия газининг Европага транзитини тўхтатган ва “Газпром” билан шартномани узайтиришни рад этганди. Бу эса мамлакат ичида газга бўлган эҳтиёжни ошириб юборган.
Февраль ойидан бери Украинада газ омборларидаги захиралар минимал даражада қолмоқда, газ эса юқори нархларда сотиб олинмоқда. Шу сабабли 27 май куни Киев Греция, Болгария, Руминия ва Молдова орқали газ импорт қилиши маълум қилинганди. Июнда Украина энергетика вазири ўринбосари Мйкола Колесник Озарбайжонга ташриф буюриб, у ерда энергетика вазири Парвиз Шахбозов билан учрашган. Улар Бокунинг Украина энергетика лойиҳаларида иштирок этиш масаласини муҳокама қилган.
Энг сўнгги маълумотларга кўра, Украина ер ости газ омборларида тахминан 6,0–6,6 миллиард кубометр газ захиралаган. Бу захиралар умумий сиғимнинг атиги 19–19,4 фоизини ташкил этади — ушбу рақамлар сўнгги 11 йил ичидаги энг паст кўрсаткич ҳисобланади.
Изоҳ (0)