“Юлдузлар жанги” фильмидаги учар мотоцикл реал ҳаётда тақдим этилди (видео)

Польшанинг Volonaut компанияси машҳур “Юлдузлар жанги” франшизасидаги транспортга ўхшаш учар мотоциклни тақдим этди. Мутахассислар таъкидлашича, транспорт нафақат визуал жиҳатдан фильмдаги транспортга ўхшайди, балки ҳақиқатан ҳам учади. Мотоцикл соатига 200 километр тезликка чиқиши мумкин.

Янги лойиҳа ҳақида интернетда тарқалган видеодан сўнг маълум бўлди. Унда байк осмонга кўтарилиб, парвоз қилгани акс этган эди. Ролик интернетда катта шов-шувга сабаб бўлди, бироқ кўплаб фойдаланувчилар уни компьютер графикаси ёки сунъий интеллект ёрдамида яратилган, дея шубҳаланди. Volonaut компанияси эса ушбу кадрларнинг мутлақо ҳақиқийлигини тасдиқлади.

Компания асосчиси Томас Патаннинг сўзларига кўра, байк реактив двигатель ва патентланган стабилизатор тизими билан жиҳозланган. Бу тизим транспортни осон бошқариш учун ёрдам беради.

“Бизнинг мақсадимиз шунчаки келажак транспортини яратиш эмас эди. Биз жангари фильмлар суратга олинадиган майдончада ишлатиш мумкин бўлган тўлиқ функсионал учувчи аппарат ишлаб чиқишни истадик. Мазкур спидер спорт мотоциклига ўхшайди, лекин осмонда ҳам ҳаракатлана олади”, дейди Патан.

Volonaut ушбу мотоциклларнинг чекланган сонини ишлаб чиқаришни режалаштирмоқда. Ҳар бир транспортнинг нархи 649 минг фунт стерлинг (тахминан 870 минг доллар)дан бошланиши кутилмоқда. Шу билан бирга, компания ушбу мотоциклнинг максимал тезлиги соатига 101 километр бўлган тижорий версиясини ҳам ишлаб чиқармоқда. Бу модел енгил ҳаво кемалари тоифасига киради ва уни бошқариш учун учувчилик гувоҳномаси талаб қилинмайди. Фақат бир шарт бор: учар транспортни аҳоли зич яшайдиган ҳудудлардан узоқроқда бошқариш керак бўлади.

Компания ҳозирда аппаратнинг дастлабки версиясини такомиллаштириш билан банд. Расмий маълумотларга кўра, 2026 йилда биринчи парвознинг тасвирлари кенг жамоатчиликка тақдим этилади. 1 августдан эса ушбу технологиянинг илк харидорлари учун олдиндан рўйхатдан ўтиш жараёни бошланади. Volonaut вакилларининг айтишича, харидорлар мотоцикл билан бирга профессионал инструкторлар иштирокидаги махсус ўқув дастурида ҳам иштирок этади.