Оғир ёки даволаб бўлмайдиган касаллик нафақат бемор учун, балки унинг яқинларига ҳам синовдир. Ўлим билан юзма-юз келиш ҳақидаги мавзуга бағишланган кўплаб таъсирли фильмлар мавжуд. Бундай лойиҳаларни суратга олишда айрим режиссёр ва сценарий муаллифлари вазиятни кулги ва ҳазил билан енгиш мумкин, деган ғояга амал қилади. Ана шунда кулги орқали тақдир зарбаларига жавоб берган ва ҳатто энг оғир паллаларда ҳам табассум қилишни унутмаган қаҳрамонлар дунёга келади.
“Опажон Бетти”
Рене Зеллвегер, Морган Фриман ва Крис Рок иштирокидаги “Опажон Бетти” фильми америкача комедия бўлиб, сюжет марказида камёб руҳий касалликка чалинган аёл туради. Қаҳрамоннинг ҳолати жиддий бўлишига қарамай, фильм комедия йўсинида ривожланади ва бахтли якун топади. Лойиҳа кассабоп бўлмаган бўлса-да, бир қатор нуфузли мукофотларга, жумладан, бош рол учун “Олтин глобус” совринига сазовор бўлган.
Сюжетга кўра, Бетти исмли аёл оддийгина официант бўлади ва тиббиёт соҳасига оид сериал кўришни яхши кўради. Кунларнинг бирида у турмуш ўртоғининг машинасига минади, аммо автомобиль ичида ноқонуний моддалар яширилганидан бехабар бўлади. Эри ўша моддалардан қутулолмагани учун икки қотил томонидан кўз ўнгида ўлдирилади. Бу даҳшатли воқеадан сўнг Бетти ўзини сериалдаги ҳамшира деб ўйлай бошлайди ва сериалдаги шифокорга гўёки ошиқ бўлади. Сўнг Бетти уни излаб йўлга чиқади, ортидан эса икки қотил кетади.
“Синфхона қаршисида”
Режиссёр Питер Вернер томонидан суратга олинган “Синфхона қаршисида” фильми болаликдаги орзусига эришган америкалик ўқитувчи Бред Коэн ҳақидаги ҳаётий драмадир. Бред туғилганидан Туретт синдроми билан яшайди, лекин шунга қарамай, ўқитувчи бўлишни мақсад қилади. Бош рол ижрочиси Жеймс Волк учун бу фильм илк йирик лойиҳа бўлган.
Аввалига 12 ёшли Бред синфдошлари томонидан масхараланади. Мактаб директори эса унга ишонч билдиради ва Бред ўқитувчи бўлишга қарор қилади. Вояга етгач, ишга кириш қийин кечади, топгач ҳам ўқувчиларнинг ота-оналари унинг касаллигидан хавотир билдириб, ўрнига бошқа муаллим талаб қилади. Аммо у болалар қалбини забт этиб, “Йилнинг энг яхши ўқитувчиси”га айланади.
“Энг муҳими — қўрқмаслик!”
Никол Кассел режиссёрлигидаги бу комедия ҳаётнинг ўткинчилиги ҳақида чуқур ўйга чорлайди ва муаммоларга кулги билан ёндашишга чақиради. Бош ролларда Кейт Ҳадсон ва Гаэл Гарсия Бернал иштирок этишган.
Доим қувноқ юрадиган Марли бир куни унга саратон ташхиси қўйилганини билиб қолади. Яшаб кетишга умид кам бўлса-да, у ҳаёт тарзини ўзгартиришни истамайди. Операция вақтида беҳуш бўлган Марли “осмон”га учади ва у ерда худо (Вупи Голдберг) унга учта тилак тилаш имконини беради. Сўнг унинг тилаклари аста-секин амалга ошади.
Бу вақтда Марли ўзининг шифокори Жулиан Голдштейнни ёқтириб қолади. Жиддий муносабатдан йироқ бўлган қиз бу сафар юрагига қулоқ солишга қарор қилади.
“1+1”
2011 йилда чиққан “1+1” фильми комедик драма жанрида бўлиб, тез орада бутун дунёда машҳурликка эришган. Фильмнинг муваффақияти актёрлар Франсуа Клизе ва Омар Сининг ҳаётий образларига боғлиқ.
Бой, лекин ногиронлар аравачасида яшовчи Филипп ўзига қаровчи сифатида ўтмишда жиноятчи бўлган қора танли Дриссни ёллайди. Дастлаб Дрисс иш берувчилардан фақат рад жавобини олиб, давлатдан ишсизлик нафақасини олмоқчи бўлади. Аммо унинг Филиппга бўлган бепарво, очиқ муносабати Филиппга ёқади. Тез орада улар чин дўстга айланишади ва бир-бирининг ҳаётига ижобий таъсир ўтказишади.
Фильм Франция киноси тарихида энг даромадли картиналардан бири бўлган ва 400 миллион доллардан ортиқ даромад келтирган. Фойданинг бир қисми фалажларга ёрдам берувчи Simon de Cyrene фондига йўналтирилган.
“Эзгулик асослари”
Роб Барнетт томонидан суратга олинган бу комедик драма турли фожиа сабаб ҳаётидаги йўлини йўқотган ёзувчи Бен ва мушак дистрофияси билан яшовчи ўспирин Тревор ҳақидаги ҳикоя қилади.
Фарзандини йўқотган Бен парвариш курсини битириб, иш излайди. Унинг биринчи бемори ногиронлик аравачасида ҳаракатланадиган, дунёга ғазаб билан қарайдиган Тревор бўлади. Болаликда отаси уни ташлаб кетган ва у ҳаётдан умид узган бўлади. Аммо Бен билан ўртасида ишонч пайдо бўлади. сўнг улар биргаликда сафарга чиқишади: улар йўлда янги танишлар, ҳаёт сабоқларга дуч келади.
Фильм илк бор 2016 йил Санденс кинофестивалида намойиш этилган. Танқидчиларнинг баҳолари турлича бўлган бўлса-да, фильм стриминг платформалар орқали томошабинларга ҳавола этилган.
Изоҳ (0)