Тошкентда банкка бостириб кириб, ходимларга ўйинчоқ тўппонча тираб, пул талаб қилган эркак 5 йилга озодликдан маҳрум қилинди. Бу ҳақда “Миллар” дастурида хабар берилди.
Воқеа 2025 йилнинг апрелида юз берганди. Ниқоб таққан эркак Юнусобод туманидаги банкда ўғирлик қилишга уринган. Ходим хавф тугмасини босгач, эркак қочишга ҳаракат қилган, аммо қўлга олинган.
“Эрталаб уйдан чиққанимда набирамнинг кичкина ўйинчоқ тўппончаси чўнтагимда қолиб кетган экан. Озгина олди бердим бор эди. Билмадим нега бу ишни қилдим ўзим ҳам ҳайронман. Қарзлар сабаб тушкунликка тушган эдим. Юнусободга келиб, шу ишни қилиб қўйдим. Ичкарига кирганимда, ўзимга ўзим айтдим, Зокир нотўғри иш қиляпсан. Кейин, ўзим чиқиб кетдим. Ҳеч кимга тегмадим, пул ҳам олмадим”, деган у судда “Миллар” дастурига берган изоҳида.
Судланувчининг айтишича, у банк бўлимида видеокузатув камераси ва қўриқлаш хизмати борлигини билмаган. У қилган иши учун пушаймонлигини билдирган. Банк ходими жабрланувчи сифатида, унга қарши даъво аризаси бермаганини айтиб, қонунда кўзда тутилган жазо тайинлашни сўради.
Суд ҳукми билан эркак Жиноят кодексининг 164-моддаси (босқинчилик) 1-қисмида кўрсатилган жиноятни содир этган деб топилиб, унга 5 йил муддатга озодликдан маҳрум қилиш жазоси тайинланди. Жазони умумий тартибли колониясида ўташ белгиланди.
Жиноят кодексига кўра, босқинчилик, яъни ўзганинг мол-мулкини талон-торож қилиш мақсадида ҳужум қилиб, ҳаёт ёки соғлиқ учун хавфли бўлган зўрлик ишлатиб ёхуд шундай зўрлик ишлатиш билан қўрқитиб содир этилган бўлса, 5 йилдан 8 йилгача озодликдан маҳрум қилиш билан жазоланади.
Июнь ойида бир гуруҳ шахслар Тошкентнинг Яшнобод туманидаги банкдан 90 минг доллар ўғирлаганди. Жами 9 нафар шахс Жиноий-процессуал кодексининг 221-моддаси тартибида ушланган. Ҳолат юзасидан тезкор-қидирув тадбирлари давом эттирилмоқда.
Изоҳ (0)