Ангренда тўрт йигит 14 ёшли қизни зўрлагани ҳақида хабар тарқалди. Болалар омбудсмани ҳолат юзасидан жиноят иши қўзғатилганини маълум қилди.
Ижтимоий тармоқларда тарқалган хабарларга кўра, махсус мактабда ўқиган қиз бувиси билан яшаб келган. Унинг отаси йўқ, онаси эса қизнинг ҳаётида иштирок этмайди. Унга нисбатан 2024 йил августдан октябригача тўрт нафар йигит томонидан бир неча бор зўравонлик ҳаракатлари содир этилган. Йигитлардан бири ҳам вояга етмаган шахс бўлган. Улар бу ҳақда кимгадир айтгудек бўлса қизни ўлдириш билан таҳдид қилишган.
Блогер ва жамоатчилик фаоли Саодат Абдузакированинг билдиришича, гумонланаётган шахслар ўз кўрсатмаларида қиз жинсий алоқа қилишга ўзи рози бўлганини айтишган.
Болалар омбудсмани ва Ижтимоий ҳимоя миллий агентлиги мазкур ҳолатни назоратга олди ва яқин ҳамкорликда иш олиб бормоқда.
Ҳолат юзасидан жиноят иши 2025 йил 9 май куни Ангрен шаҳар ИИБ томонида қўзғатилган бўлиб, дастлабки тергов ҳаракатлари давом этмоқда. Тергов жараёни Ангрен шаҳар прокуратураси томонидан назоратга олинган.
“Болалар омбудсмани ўз ваколати доирасида вояга етмаганга нисбатан содир этилган жиноят юзасидан олиб борилаётган иш юритуви бўйича кузатувни олиб бормоқда. Шу билан бирга, жабрланувчи қизнинг процессуал ҳуқуқлари кафолатланганини таъминлаш масаласи ҳам доимий мониторингда”, дейилади болалар омбудсмани хабарида.
Ижтимоий ҳимоя миллий агентлигининг ҳудудий “Инсон” ижтимоий хизматлар маркази мутахассислари жабрланган болани ҳимоялаш ва реабилитация қилиш юзасидан ўз вақтида комплекс чораларни кўрмоқда.
Агентлик хабарида маълум қилинишича, айни пайтда вояга етмаган қиз бронхопневмания ва анемия ташхиси билан касалхонада даволанмоқда.
Изоҳ (0)