Angrenda to‘rt yigit voyaga yetmagan qizni zo‘rlaganlikda gumonlanmoqda

Angrenda to‘rt yigit 14 yoshli qizni zo‘rlagani haqida xabar tarqaldi. Bolalar ombudsmani holat yuzasidan jinoyat ishi qo‘zg‘atilganini ma’lum qildi.

Ijtimoiy tarmoqlarda tarqalgan xabarlarga ko‘ra, maxsus maktabda o‘qigan qiz buvisi bilan yashab kelgan. Uning otasi yo‘q, onasi esa qizning hayotida ishtirok etmaydi. Unga nisbatan 2024-yil avgustdan oktyabrigacha to‘rt nafar yigit tomonidan bir necha bor zo‘ravonlik harakatlari sodir etilgan. Yigitlardan biri  ham voyaga yetmagan shaxs bo‘lgan. Ular bu haqda kimgadir aytgudek bo‘lsa qizni o‘ldirish bilan tahdid qilishgan.

Bloger va jamoatchilik faoli Saodat Abduzakirovaning bildirishicha, gumonlanayotgan shaxslar o‘z ko‘rsatmalarida qiz jinsiy aloqa qilishga o‘zi rozi bo‘lganini aytishgan.

Bolalar ombudsmani va Ijtimoiy himoya milliy agentligi mazkur holatni nazoratga oldi va yaqin hamkorlikda ish olib bormoqda.

Holat yuzasidan jinoyat ishi 2025-yil 9-may kuni Angren shahar IIB tomonida qo‘zg‘atilgan bo‘lib, dastlabki tergov harakatlari davom etmoqda. Tergov jarayoni Angren shahar prokuraturasi tomonidan nazoratga olingan.

“Bolalar ombudsmani o‘z vakolati doirasida voyaga yetmaganga nisbatan sodir etilgan jinoyat yuzasidan olib borilayotgan ish yurituvi bo‘yicha kuzatuvni olib bormoqda. Shu bilan birga, jabrlanuvchi qizning protsessual huquqlari kafolatlanganini ta’minlash masalasi ham doimiy monitoringda”, deyiladi bolalar ombudsmani xabarida.

Ijtimoiy himoya milliy agentligining hududiy “Inson” ijtimoiy xizmatlar markazi mutaxassislari jabrlangan bolani himoyalash va reabilitatsiya qilish yuzasidan o‘z vaqtida kompleks choralarni ko‘rmoqda.

Agentlik xabarida ma’lum qilinishicha, ayni paytda voyaga yetmagan qiz bronxopnevmaniya va anemiya tashxisi bilan kasalxonada davolanmoqda.