Қурилиш ва уй-жой коммунал хўжалиги вазири Ботир Зокиров лавозимидан озод этилди 

Қурилиш ва уй-жой коммунал хўжалиги вазири Ботир Зокиров соғлиғи туфайли лавозимидан озод этилди. Бу ҳақда президент матбуот котиби хабар берди.

Вазирнинг биринчи ўринбосари Шерзод Ҳидоятов вазир вазифасини бажарувчи этиб тайинланди.

Ботир Зокиров 1963 йилнинг 28 июлида Тошкент шаҳрида туғилган. Тошкент политехника институтини (ҳозирги Тошкент давлат техника университети) қурувчи-муҳандис мутахассислиги бўйича тамомлаган.

1980 йилда Тошкент инструментал заводида меҳнат фаолиятини бошлаган. 1985—1990 йилларда “Тошсантехмонтаж” трестида ишлаган. 1990 йилда эса “12-трест” қурилиш ширкатида иш бошлаб, бу ерда чилангарликдан бошқарув кенгаши раиси лавозимигача кўтарилган. 2011 йилда президент фармони билан бош вазири ўринбосари — Давлат архитектура ва қурилиш қўмитаси раиси этиб тайинланган.

Шавкат Мирзиёевнинг 2016 йил 14 декабрдаги фармонига мувофиқ, Ботир Зокиров Давлат архитектура ва қурилиш қўмитаси раиси лавозимига тасдиқланганди. 2019 йил 31 августда эса давлат раҳбарининг фармонига мувофиқ, Ботир Зокиров Қурилиш вазири лавозимига тайинланган эди.