АҚШ президенти Дональд Трамп Илон Маск билан содир бўлган шов-шувли зиддиятдан кейин шахсий суҳбатларда уни “ашаддий гиёҳванд” деб атаган. Бундан бир оз аввалроқ эса миллиардер Маск АҚШ молия вазири Скотт Бессент билан тортишиб кетган, иш ҳатто муштлашувгача борган. Бу ҳақда The Washington Post нашри ўз манбаларига таяниб ёзмоқда.
Газетанинг ёзишича, Трамп “дунёдаги энг бой одам” билан оммавий зиддият ортидан тушкунликка тушган ва Маскнинг позициясини тушунишга уриниб, танишларига қўнғироқ қилган ва у билан нима содир бўлаётганини сўрай бошлаган.
Оқ уй вакилларининг таъкидлашича, Трампнинг Маск наркотик моддалар истеъмол қилаётган бўлиши мумкинлиги ҳақидаги хавотири “уларнинг муносабатларидаги узоқлашув сабабларидан бирига” айланган.
“Пайшанба кунги тортишувдан сўнг президент атрофидаги одамлардан вазиятни янада кескинлаштирмасликни сўраган, вице-президент Жей Ди Венсни эса омма олдида Маск ҳақида гап борганда эҳтиёткорлик билан ёндашишга чақирган”, деб ёзади газета ўз манбаларига таяниб.
The Washington Post шунингдек, Маск ва Трамп маъмурияти ўртасидаги муносабатларнинг кескинлашишига олиб келган, апрель ойи ўрталарида юз берган яна бир воқеани келтириб ўтади. Унга кўра, ўшанда Овал кабинетдаги учрашувдан сўнг, Маск ва молия вазири Бессент давлат амалдорларидан бирининг тайинлови борасида келиша олмаган. Улар бир-бирига нисбатан ҳақоратли сўзлар ишлатиб, тортишиб кетган.
“Шундан сўнг Маск, худди регби ўйинчисига ўхшаб, Бессентни елкаси билан кўкрак қисмига уриб юборди. Бессент эса жавоб зарбаси тариқасида унга мушт туширди. Бир неча киши уларни ажратиш учун аралашишга мажбур бўлди”, деб ёзади нашр Трампнинг собиқ маслаҳатчиси Стив Беннонга таяниб.
Маълумот ўрнида, АҚШ президенти Дональд Трамп ва уни президентлик пойгасида фаол қўллаб-қувватлаган миллиардер Илон Маск ўртасидаги зиддият янги босқичга чиқди. Олдинроқ уларнинг ҳар иккиси ўз ижтимоий тармоқлари Truth Social ва Х’да айбловлар ёғдирган эди.
Изоҳ (0)