“Ливерпуль” эгаси бўлган Fenway Sports Group Ла Лига клубини сотиб олишни режалаштирмоқда

Американинг йирик спорт компанияси Fenway Sports Group (FSG) Испаниянинг “Хетафе” клубини харид қилиш бўйича музокаралар олиб бормоқда. Бу ҳақда Marca нашри хабар берди.

Манбага кўра, FSG компанияси Red Bull ва бошқа йирик ташкилотлар каби кўпклубли (мулти-клуб) тизим яратиш ниятида. Компания ҳозирда бир нечта спорт жамоаларига эгалик қилади: бейсболдаги “Бостон Ред Сокс”, хоккейдаги “Питцбург Пенгвинз” ва NASCAR мусобақасидаги “РФК Расинг” шулар жумласидандир.

Эндиликда FSG бор эътиборини Европа футболига қаратмоқчи. “Хетафе” эса бу борада улар учун жозибадор вариантга айланган. Клубнинг афзалликлари сифатида унинг Мадрид яқинидаги географик жойлашуви, ёш истеъдодларни топиш ва сотиш имконияти, шунингдек, янги стадион қурилиши каби омиллар кўрсатилмоқда. Маълумотларга кўра, стадион қурилиши аллақачон бошланган.

“Хетафе” президенти Анхел Торрес аввалроқ шуни маълум қилганки, клуб янги стадионга кўчганидан сўнг, у раҳбарлик лавозимини тарк этади.

Шунингдек, FSG илгари “Малага” клубини харид қилиш имкониятини ҳам кўриб чиққан, бироқ бу режа амалга ошмаган.