Янги Тошкентга ўндан ортиқ вазирлик ва идоралар кўчиб ўтгани маълум қилинди

Ўндан ортиқ вазирлик ва идоралар Янги Тошкентда вақтинча ташкил этилган объектларда фаолият бошлаган. Бу ҳақда бугун, 20 август куни президент Шавкат Мирзиёевга қилинган тақдимотда қайд этилган.

Президент матбуот хизмати хабарига кўра, ҳудудда 60 дан ортиқ давлат идоралари учун маъмурий бинолар барпо этилади.

Янги Тошкент қурилишига 2023 йилда старт берилган. Қурилишлар учун Юқори Чирчиқ ва Ўрта Чирчиқ туманларидан 19 минг 700 гектар ер ажратилган. Лойиҳанинг концепцияси Буюк Британиянинг “Cross-wоркс” компанияси томонидан ишлаб чиқилган.

Биринчи босқичда олти минг гектар майдонда иншоотлар қурилиб, 600 минг аҳоли учун замонавий шароитлар яратилади. Лойиҳа тўлиқ якунланганида 2 миллион нафар одам яшайдиган айланади.

Ҳозирги кунда шаҳарнинг ерости муҳандислик тармоқлари қурилмоқда. Хусусан, бир ва икки сексияли коллекторлар ётқизиляпти. Улар орқали марказлашган иссиқлик ва сув қувурлари, электр энергияси, телекоммуникация каби барча муҳандислик тармоқлари ер остидан ўтказилади. Шунингдек, транспортларнинг эркин қатнови учун туннеллар ва ерости тураргоҳлари қурилади.

“Ҳар бир лойиҳада замонавий ёндашув, мукаммал ечим ва яшиллик эътиборга олинмоқда. Хусусан, экологик тоза транспорт тизими ташкил этилади. Метро ва электробуслар ҳаракати мувофиқлаштирилади. Пиёдалар ҳамда велосипедчиларнинг тўсиқсиз ва хавфсиз ҳаракатланиши учун кенг қулайлик яратилади”, дейилади манбада.

Хабарга кўра, шаҳарнинг янги қисмига кўплаб маҳаллий ва хорижий инвесторлар қизиқиш билдиряпти. Ҳозирда аукционда сотилган 13 та тижорий лотлар бўйича 554 миллион долларлик инвестиция шартномалари тузилган.

“Ҳудуддаги қурилиш жараёнида 160 минг нафар аҳолининг бандлиги таъминланади. Келажакда эса шаҳарда инновацион технологияга асосланган, юқори даромадли юз минглаб доимий иш ўрни бўлади. Бунинг учун янги таълим ва тиббиёт кластерлари, ахборот технологиялари хизматлари ва технопарклар ташкил этилади”, дейилади манбада.

Тақдимотда президент лойиҳаларга инвестициялар жалб этиш, дам олиш жойлари ва хизматларни қулай йўлга қўйиш бўйича тавсиялар берган.

Жорий йил июнь ойида Қурилиш ва уй-жой хўжалиги вазири Шерзод Ҳидоятов Янги Тошкентда вазирликларнинг вақтинчалик биносини қуриш ишлари кетаётганини, яқинда бир неча вазирлик бинолари ҳудудга кўчирилишини айтганди. Жумаладан, Энергетика вазирлиги кўчгани, Транспорт, Қурилиш ва Экология вазирликлари ҳам яқин кунларда тўлиқ кўчиши қайд этилган.