Дунёдаги энг машҳур футболчилардан бири, Саудия Арабистонининг “Ан-Насср” клуби ва Португалия терма жамоаси ҳужумчиси Криштиану Роналду 40 ёшида севгилиси Жоржина Родригесга турмуш қуриш таклифини берди.
Родригес Instagram’да бармоғига тақилган йирик бриллиант узук тасвирини жойлаб, изоҳда “Ҳа, бирга бўлишни истайман. Ҳозирги ҳаётимда ҳам, кейингисида ҳам”, деб ёзди ва суратда Роналдуни белгилади.
Заргарлик устаси Аджай Ананда таъкидлашича, узук 30 карат атрофидаги Д тоифали бриллиант билан безатилган бўлиб, унинг қиймати тахминан 5 миллион долларни ташкил этади. Бошқа бир мутахассис Лора Тейлор эса марказий тошнинг оғирлиги 15–20 карат атрофида бўлиши ва узук нархи 2 миллион доллардан ошиши мумкинлигини айтмоқда.
Роналду ва Родригес 2016 йилдан бери бирга бўлиб, беш нафар фарзандни тарбиялайди: Криштиану кичик, суррогат онадан туғилган эгизаклар Эва ва Матео, ҳамда икки қизи — Алана Мартина ва Белла Эсмералда.
2025 йил 28 январда у Х ижтимоий тармоғи саҳифасида севгилисини туғилган куни билан табриклаб, илк бор уни “рафиқам” деб атаган.
2023 йил январидан бери “Ан-Наср” сафида тўп сураётган Роналду Саудия Арабистонига оиласи билан кўчиб ўтган. Мамлакат қонунларига кўра, эркак ва аёл никоҳсиз бир уйда яшай олмайди, бироқ афсонавий футболчига истисно тариқасида фарзандлари онаси билан бирга яшашга рухсат берилган.
Роналду футбол тарихида кўплаб ютуқларга эришган спортчидир. У 2016 йилда Португалия билан Европа чемпиони, УЕФА Миллатлар Лигасининг икки карра ғолиби, шунингдек, “Спортинг” (Лиссабон), “Манчестер Юнайтед”, “Реал Мадрид” ва “Ювентус” клубларида ҳам фаолият юритган. 2024 йил июнида эса у “Ан-Насср” билан шартномасини 2027 йилгача узайтирган.
Изоҳ (0)