Навоийда ЙПХ ходимига 1 млн сўм пора таклиф қилган қоидабузар ҳайдовчи ушланди
Навоий вилояти Зарафшон туманида ЙПХ ходимига пора беришга уринган қоидабузар ҳайдовчи қўлга олинди. Бу ҳақда ИИВ ЙҲХХ ахборот хизмати хабар берди.
Маълум қилинишича, 27 февраль куни Навоий вилояти ИИБ ЖХХ ЙҲХБ инспектори соат 09:15 лар атрофида “Зарафшон” йўл-патрул масканида Навоий—Зарафшон йўналишида ҳаркатланиб келаётган Nexia-2 автомобилига тўхташ ишорасини берган. Бироқ ҳайдовчи ходимнинг қонуний талабига бўйсунмасдан қочиб кетган.
Қоидабузар ҳайдовчи кейинги манзилда тўхтатилганида, ўзини Жиззах вилоятидан эканини билдирган 31 ёшли фуқаро автомобилни тегишли ҳужжатларсиз бошқаргани маълум бўлган. Ҳайдовчисига нисбатан Маъмурий жавобгарлик тўғрисидаги кодекснинг 194 (Ички ишлар органлари ходимининг қонуний талабларини бажармаслик), 135-моддалари (Йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) билан маъмурий баённома расмийлаштирилиб, автомашина жарима майдончасига жойлаштирилган.
Ҳайдовчи машинани жарима майдонидан чиқариш ва маъмурий баённома бўйича чора кўрмаслик эвазига ЙПХ ходимига 1 миллион сўм пора таклиф қилган. Шу куни ИИВ Шахсий хавфсизлик бош бошқармаси Навоий вилояти бўйича бошқармаси ҳамда департаментнинг Зарафшон бўлими ходимлари билан тезкор тадбир ўтказилган. Тадбирда фуқаро ЙПХ ходимига 1 миллион сўмни берган вақтида қўлга олинган.
Ҳозирда ҳолат юзасидан Жиноят кодексининг 211-модда (Пора бериш) 1-қисми билан тергов ҳаракатлари олиб борилмоқда.
