Владимир Норов Япониянинг Ўзбекистондаги янги элчисини қабул қилди (фото)
Ташқи ишлар вазири Владимир Норов 5 декабрь куни Япониянинг мамлакатдаги фавқулодда ва мухтор элчиси этиб тайинланган Такаши Хаторини қабул қилди. Бу ҳақда вазирлик матбуот хизмати хабар берди.
Учрашув элчининг ишонч ёрлиқлари нусхаларини топшириш маросими билан бошланди. Вазир элчини лавозимга киришиши билан табриклаб, касбий фаолиятида муваффақиятлар тилади. Суҳбат чоғида Ўзбекистон—Япония стратегик шериклик муносабатлари ва кўп қиррали ҳамкорлигини янада ривожлантириш масалалари муҳокама қилинди.
Шавкат Мирзиёевнинг 2019 йил декабрь ойида Японияга амалга оширган расмий ташрифи юқори даражадаги ишонч ва ўзаро англашувга эришиш, соҳаларда икки томонлама ҳамкорликни мустаҳкамлаш учун зарур механизмларни яратиш имконини бергани қайд этилди. Олий даражада эришилган барча келишувларни амалга оширишни жадаллаштириш бўйича чоралар кўриш зарурлиги таъкидланди.
Бўлажак қўшма тадбирлар жадвали ва ташкилий жиҳатлари, жумладан, «Марказий Осиё + Япония» мулоқоти йиғилиши ўтказиш масалалари кўриб чиқилди. Томонлар савдо-иқтисодий алоқаларни ривожлантириш ва икки мамлакат ишбилармон доиралари ўртасидаги муносабатларни фаоллаштиришдан манфаатдор эканини билдирди. Халқаро ташкилотлар доирасидаги ҳамкорликни давом эттиришга келишиб олинди. Учрашувда халқаро ва минтақавий масалалар юзасидан ҳам фикр алмашилди.
