Ўзбекистон шароитида маймунжон навлари синаб кўрилмоқда
Академик Мирзаев номидаги Боғдорчилик, узумчилик ва виночилик илмий-тадқиқот институтида маймунжоннинг 3 та: «Техас», «Честер» ва «Частер Торнлесс» навларининг қимматли хўжалик-биологик хусусиятлари устида илмий изланишлар олиб борилмоқда. Бу борада «Май Агро» фермер хўжалиги билан ҳамкорликда ишланмоқда.
Қишлоқ хўжалиги вазирлигининг маълум қилишича, «Май Агро» фермер хўжалиги 2019 йилда ташкил топган бўлиб, 1 гектар ер майдонига маймунжон ўсимлигининг «Честер» навини ўстирмоқда. Ушбу нав 3×1,20 см схемасида экилган бўлиб, томчилатиб суғориш тизими ёрдамида суғорилади. Институтнинг «Мевали экинлар селекцияси ва нав ўрганиш» бўлими илмий ходимлари фермер хўжалигига бориб, доим ўз маслаҳатларини бериб боришади. Тупроқ таҳлилларини ўтказиш ҳамда меваларнинг кимёвий таркибини ўрганишда амалий ёрдам беришади.
Маймунжон – малина авлодидан бўлган ўсимликдир. Ўзбекистонда дарё бўйларида, суғориш шаҳобчалари ёқаларида жуда кўп ўсади. Маданий ҳолда камдан-кам учрайди. Маймунжон мевасининг таркибида ҳар хил витаминлар мужассам, масалан: каротиноид, фолий кислотаси (витамин B9), C витамини, К витамини ҳамда оз миқдорда E витамини мавжуд. Бундан ташқари маймунжон мевасида минераллардан калий, мис, кальций, магний ва цинк бор.
Маймунжон илдиз бачки чиқармайди, ер бағирлаб ўсадиган новдалари эса бўғимларидан ёки учларидан илдиз отади ва янги тупчалар ҳосил қилади. Маймунжоннинг йирик мевали серҳосил навлари И.В.Мичурин томонидан ихтиро қилинган. Бу навлар баъзи ҳаваскорлар барпо этган боғларда ўсади.
