Ўзбекистонда 2-босқич магистратура талабаларига контракт миқдори оширилгани ҳақидаги хабарларга муносабат билдирилди
Ўзбекистонда 2-босқич магистратура талабалари томонидан бу йилги ўқув жараёни учун амалга ошириладиган тўлов шартнома пуллари борасида тушунмовчиликларга асосланган хабарлар тарқалмоқда. Олий ва ўрта махсус таълим вазирлиги ҳолатга муносабат билдирди.
Вазирлик матбуот хизмати хабарида таъкидланишича, президентнинг 2021 йил 22 июндаги ва 2022 йил 15 июндаги қарорларида давлат олий таълим муассасалари магистратурасига қўшимча қабул параметрлари асосида ўқишга қабул қилинганларнинг тўлов-контракт суммаси бир талабага тўғри келадиган реал харажатлардан келиб чиқиб, олий таълим муассасаси томонидан мустақил белгиланиши кўрсатилган.
Уларга кўра, магистратура (клиник ординатура)га ўтган ўқув йилида қўшимча қабул қилинган талабалар белгиланган тўлов-контракт суммасини шартномага мувофиқ 2022/2023-ўқув йилида ҳам шу миқдорда тўлашлари лозим.
Аммо ижтимоий тармоқларда мазкур тартибдаги тўлов миқдори нотўғри, яъни оширилган ёки табақалаштирилган (супер) контракт сифатида ундирилаётгани талқин қилинмоқда.
«Эслатиб ўтамиз, бу тўлов миқдори оширилган ёки супер контракт ҳисобланмайди. Жамоатчилик, оммавий ахборот воситалари, шу жумладан талабалар ва уларнинг яқинларидан тўловлар борасида савол туғилганда расмий манбаларга таянишлари, асоссиз хабарларга ишонмасликларини сўраб қоламиз», — дейилади муносабатда.
Мавзуга доир: Ўзбекистонда докторантура квоталари тасдиқланди — инфографика
