Telegram каналларда Самарқанд шаҳрида барпо этилган Самарқанд туризм марказидаги ҳожатхоналар ёмон аҳволда экани тасвирланган, саммитдан сўнг марказдаги тозаликка эътибор қаратилмаётгани айтилган видеолар тарқалди. «Дарё» мухбири жамоатчилик эътиборини қаратган масалани ўрганиш учун ушбу манзилда бўлди.
2022 йилнинг 15—16 сентябрь кунлари Самарқанд шаҳрида Шанхай Ҳамкорлик Ташкилоти саммити бўлиб ўтди. Самарқанд туризм марказининг PR ва маркетинг бўлими директори Динора Аҳмедованинг маълум қилишича, саммитдан сўнг тадбирда иштирок этган ходимларга бир кунга дам берилган. Ишчи ходимлар 18 сентябрь куни дам олган. Айнан ўша куни аҳолига Самарқанд туризм марказининг «Боқий шаҳар» қисмига киришга рухсат берилган.
Уч ойдан буён Самарқанд туризм марказида ишлаб келаётган Зиёда Саидқулова ижтимоий тармоқларда тарқалган хабарлар иғвогарлик эканлигини билдирмоқда. У аҳолидан инсон меҳнатини қадрлашларини сўраб, ижтимоий тармоқларда тарқатилган ҳолатни қораламоқда.
Мен уч ойдан буён шу ерда тозалаш ишлари билан шуғулланаман. Бу ер фақат саммит учун қилинмаган. Ижтимоий тармоқларда тарқалган хабарлар нотўғри. Бу ердаги тозалик бизнинг меҳнатларимиз самараси ҳисобланади. 18 сентябрь куни бизга бир кунга дам берилганди. Ижтимоий тармоқларда тарқалган иғвогарлик видеоси ҳам айнан ўша куни аҳоли кирганда тасвирга олинган. Мен одамлардан бундай қилмасликларини илтимос қилган бўлардим, — дейди Зиёда Саидқулова.Зиёда Саидқулова ҳожатхонада ҳамма ҳам ишлайвермаслигини айтмоқда
Одамлар кўпайиб кетган пайтда тозалашга улгурмай қолишимиз ҳам мумкин. Видеога олган одам шу вақтдан фойдаланган кўринади. Лекин бу ерда ҳеч қачон ифлосгарчиликка йўл қўйилмайди. Доимо тозаликка масъул одамлар бор. Бизнинг ишимизни ҳам текшириб турувчилар бор. Ҳамма нарса етарли қилиб етказиб берилади. Қолаверса, ҳожатхоналарда ҳамма ҳам ишлайвермайди. Шунинг учун тозаликка риоя қилишларингизни сўрайман, — дейди Зиёда Саидқулова.Самарқанд туризм марказининг PR ва маркетинг бўлими директори Динора Аҳмедованинг қўшимча қилишича, сайёҳлик марказининг жамоат жойларини тозалашга 100 га яқин киши жалб этилган. Улар икки сменада: соат 5:00 дан 14:00 гача, 14:00 дан 23:00 гача бўлган вақтлар оралиғида ишлайди.
Яқин кунларда тунги тозалаш сменаси ҳам қўшилади. Ҳудудни ободонлаштириш, кўкаламзорлаштириш, кўчат экиш ва суғориш, ўсимликларни парвариш қилиш ишларига 520 нафарга яқин киши жалб этилган, — дейди у.
Изоҳ (0)