Фарғонада электромобиллар ишлаб чиқариш йўлга қўйилади

Фарғонадаги корхонада йил якунига қадар электромобиллар ишлаб чиқариш йўлга қўйилади. Бу ҳақда «Дарё» мухбири Азизжон Эрматов хабар бермоқда.

Қайд этилишича, вилоят ҳокими Хайрулло Бозоров Фарғона шаҳридаги кичик саноат зонасида жойлашган Central Asia Motors корхонасида бўлиб, енгил ва юк электромобилларини ишлаб чиқариш лойиҳаси бўйича қилинган ишларни кўздан кечирган.

Йилига 10 минг дона автомобиль ишлаб чиқариш қувватига эга лойиҳанинг умумий қиймати 50 миллион долларга баҳоланмоқда. Шундан 40 миллион долларни тўғридан-тўғри хорижий инвестициялар ташкил этади.

Режага кўра, лойиҳа тўлиқ ишга тушиши билан 350 та иш ўрни яратилади. Йиллик 10 минг электромобиль ишлаб чиқариш йўлга қўйилади ва унинг 40 фоизи экспортга йўналтирилади.

Шунингдек, бу ерда электромобиллар учун кузов, заряд станцияси, аккумулятор эҳтиёт қисмлари ишлаб чиқарилиши маҳаллийлаштирилади.

Корхона бош директори Баҳодир Аҳмедовнинг маълум қилишича, электромобиллар ишлаб чиқариш жараёни жорий йил якунига қадар бошланади.