Ўзбекистон қонунчилигида адвокатларнинг ҳам суд экспертизаси тайинлаш ҳуқуқи белгиланди
Ўзбекистон қонунчилигида адвокатларнинг ҳам суд экспертизаси тайинлаши ҳамда нодавлат суд-экспертиза ташкилотлари экспертларининг судларда иштирок этиш ҳуқуқи белгиланди. Бу ҳақда АОКАда Адлия вазирлиги ахборот хизмати раҳбари Севара Ўринбоева иштирокида ўтказилган брифингда маълум қилинди.
Шунингдек, Маъмурий жавобгарлик тўғрисидаги кодексга ижтимоий аҳамиятга молик очиқ маълумотларни эълон қилмаганлик ёки тўлиқ эълон қилмаганлик, эълон қилиш муддатларига ва тартибига риоя этмаганлик ёки маълумотларни бузиб кўрсатганлик учун жарима белгиланиши киритилмоқда.
Бундан ташқари, 2023 йил 1 январдан адвокатлик фаолияти билан шуғулланиш ҳуқуқини берувчи лицензияни олиш бўйича мурожаатлар, шунингдек, лицензияни бериш ва қайта расмийлаштириш бўйича барча тартиб-таомиллар «Лицензия» ахборот тизими ёки Ягона интерактив давлат хизматлари портали орқали амалга оширилади.
Адвокатлик фаолияти учун лицензия олиш билан бир вақтда талабгорнинг хоҳишига кўра, адвокатлик бюросини ҳам давлат рўйхатидан ўтказиш учун композит хизмат кўрсатиш имкони яратилмоқда. Бундан ташқари, энди лицензия йўқотилганда ёки яроқсиз ҳолга келганда, лицензиянинг дубликатини олиш зарурати мавжуд бўлмайди.
