Хоразм вилояти Гурлан туманида ИИБ ходимлари фуқарога куч ишлатгани, оқибатда жабрланувчи шифохонага ётқизилгани айтилганди. Вилоят ички ишлар бошқармаси ахборот хизмати ҳолат юзасидан муносабат билдирди.
Маълум бўлишича, 1988 йилда туғилган Ш.Ю. 11 август куни ижтимоий тармоқлар орқали мурожаат йўллаб, унда Гурлан тумани ИИБ ходимлари уни асоссиз туман ИИБ биносида бир кеча сақлаб, уриб қийнагани, ўзи ҳеч қандай жиноятга алоқадор эмаслигини билдириб ўтган.
Гурлан тумани ИИБга 4 август куни туман марказидаги кафе олдида тўхтаб турган Captiva автомашинаси салонида бўлган бир гуруҳ шахслар гиёҳвандлик воситаси истеъмол қилаётгани тўғрисида маълумот келиб тушган. Ушбу маълумотни текшириб кўриш учун туман ИИБ тезкор ходимлари зудлик ҳодиса жойига етиб бориб, автомашина салони ва у ерда бўлган шахсларнинг ёнини кўздан кечирганида автомашина салонида гиёҳвандлик воситаларини истеъмол қилиш учун мосланган елим идиш ва гиёҳвандлик воситасига ўхшовчи ўткир ҳидли модда борлиги аниқланган.
Шундан кейин ҳолатга аниқлик киритиш учун ушбу шахслар туман ички ишлар бўлимига олиб борилган. Ушбу шахслар орасида ижтимоий тармоқлар орқали мурожаат йўллаган фуқаро Ш.Ю. ҳам бўлган. У илгари гиёҳвандлик воситаларини қонунга хилоф равишда ўтказиш билан боғлиқ жиноят учун судланган бўлиб, туман ИИБ пробация гуруҳи ҳисобида туриши боис ички ишлар бўлими ходимларини яқиндан таниган.
Автомашина салонида бўлган беш нафар шахс, жумладан, Ш.Ю. ҳам дастлаб суд-тиббий ва суд-кимёвий экспертизасидан ўтказилган. Автомашинадан топилган ўткир ҳидли модда суд-кимёвий экспертизаси хулосасига кўра гашиш гиёҳвандлик воситаси экани маълум бўлган.
Шуни алоҳида таъкидлаб ўтиш лозимки, бугунги кунда ички ишлар органларига келтирилган ҳар бир шахс белгиланган тартибда рўйхатга олинади. Шу билан биргаликда, ички ишлар бўлими маъмурий биноси, жумладан, сўроқ қилиш хоналари кузатув камералари билан жиҳозланган бўлиб, сўроқ қилинувчи шахсларга нисбатан қийноқ қўлланилишига йўл қўйилмайди.Ҳозирги кунда фуқаро Ш.Ю.нинг ижтимоий тармоқ орқали йўллаган мурожаати ҳуқуқий баҳо бериш учун прокуратура органлари томонидан ўрганиб чиқилмоқда.Бундан ташқари, ички ишлар бўлимида сўроқ қилинган шахсларнинг келгусида жавобгарликдан қутулиб қолиш мақсадида турли асоссиз даъволар билан мурожаат қилишининг олдини олиш мақсадида ички ишлар бўлимида ушлаб турилган шахсларни қўйиб юбориш пайтида тиббий гувоҳлантиришдан ўтказиш ҳам йўлга қўйилган бўлиб, мазкур ҳолатда ушбу беш нафар шахс врач томонидан тиббий гувоҳлантирилганида уларда тан жароҳати йўқлиги қайд этилган, — дейилади муносабатда.
Изоҳ (0)