Ўзбекистонда ОИВ, Б ва C гепатитлари, инсон папилломавируси, сил, герпес ва бошқа инфекцияларни аниқлаш учун ПCР тест тизимлари ишлаб чиқилиши кутилмоқда.

Тест тизимлари тиббиёт, ветеринария ва озиқ-овқат хавфсизлиги соҳалари учун биотехнологик маҳсулотларни ишлаб чиқиш ва ишлаб чиқариш билан шуғулланадиган «Росса» МЧЖ компаниясида ишлаб чиқилади. 7 август куни бош вазир ўринбосари — инвестициялар ва ташқи савдо вазири Жамшид Хўжаев бошчилигидаги Ташқи савдо, инвестициялар, маҳаллий саноатни ривожлантириш ва техник жиҳатдан тартибга солиш масалалари бўйича ҳукумат комиссияси Тошкент вилоятида жойлашган ушбу компанияни кўздан кечирган.

Вазирлик матбуот хизмати хабарида айтилишича, компания ишини ташкил қилиш учун 5 миллион доллардан ортиқ маблағ жалб қилинган. Бу ерда замонавий ускуналар ўрнатилди ва тажрибали мутахассислар ишламоқда. 2021—2022 йиллардаги пандемия даврида компания СЕС эҳтиёжлари учун COVID-19 ташхисини қўйиш учун 3,8 миллион ПCР тестини етказиб берган.

Бу, биринчи навбатда, маҳаллий ишлаб чиқарилган диагностика воситаларига ички талабни қисман таъминлашга, иккинчидан, битта тест нархини 2021 йилда 30 минг сўмгача, 2022 йилда эса 27 минг сўмгача камайтиришга имкон берган.

Ҳукумат комиссияси ташрифи давомида компаниянинг янги ишланмалари, шу жумладан ОИВ, Б ва C гепатитлари, инсон папилломавируси, сил, герпес ва бошқа инфекцияларни аниқлаш учун ПCР тест тизимлари тақдим этилган.