«Лўличилик қилманг, эшитинг гапимни». Қонунчилик палатасида Алишер Қодиров ва Расул Кушербаев ўртасида тортишув юз берди
Бугун, 21 июнь куни Олий Мажлис қонунчилик палатасининг навбатдаги йиғилиши бўлиб ўтди. Йиғилишда «Электрон далиллар билан ишлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳаси муҳокама қилинди.
«Электрон далил масаласида мутахассислар саволларимизга қози сифатида, жиноят процессуал жиҳатдан жавоб беришяпти. Аммо бу ерда техник ечим берилиши керак. Ҳозир электрон далил орқасида жуда катта электрон базасига битта ҳаракат билан кириш имконияти бўлади. Бугун катта компаниялар ўзининг маълумотларини, хусусан, тижорат сирига оид маълумотларини электрон шаклда сақлайди.
Қанақадир арзимас нарса орқали ўша электрон базага кириш имконияти яратилса, ўша компания банкрот бўлиши мумкин. Электрон далил ташаббускорлари техник ечим беришгани йўқ. Электрон ‘доступъга шароит бердикми, унинг ичидан нималар чиқиб кетишига ҳеч ким кафолат бермайди. Биз шошилмаслигимиз керак.
Мутахассислар техник ечим қайси чегарадан ажратиб олинишини айтиб беришлари керак. Ҳозир мана озодликсевар депутатимиз Расул Хидралиевич ўзи ҳам буни билмаяпти-ку, тушунмаяпти», — деди Алишер Қодиров.
Бунга жавобан, Расул Кушербаев масалани яхши тушунишини айтди.
«Кечириб қўясиз, мен яхши тушуниб турибман. Қонунни яхшилаб ўқиш керак. Сизлар ўқимаяпсизлар», — деди у.
Алишер Қодиров эса қонунни ўқиганини тушунтирди.
«Қонунни ўқидим. Лўличилик қилманг, эшитинг гапимни. Саволга жавоб бериш учун чиқдингиз бу ерга. Сиз саволга жавоб беринг. Техникмисиз, IT’ни тушунасизми? Электрон маълумот нима эканлигини тушунасизми? Ҳеч нимани тушунмайсиз. Битта саволга ҳам жавоб бера олганингиз йўқ», — деди у.
Маълум қилинишича, қонун лойиҳаси аввалги йиғилишда дастлабки муҳокамадан ўтган. Муҳокама якунида депутатлар қонун лойиҳасини иккинчи ўқишда қўмитага қайтарилишига овоз берди.
Бу ҳолатдан кейин Расул Кушербаев Telegram’даги каналида пост қолдирди.
«Мен ҳақиқатан ҳам озодликни севаман ва ўзимни озод инсон деб биламан. Бу менинг энг қадрли бойлигим. Менимча қолганлар ҳам озодликни севиб, ўзларини озод инсонлар деб билишади, айниқса депутатлар. Биз озодсеварлармиз» – деб ёзган депутат.
Шунингдек, Қонунчилик палатаси спикерининг ўринбосари Одилжон Тожиев ҳам ўз каналида ҳолатга изоҳ берди.
«Бугун бўлиб ўтган Ялпи мажлисда айни пайтда муҳокамада бўлиб турган «Электрон далиллар билан ишлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳаси юзасидан Алишер Қодиров ва Расул Кушербаев ўртасида баҳс вужудга келди.
Парламентда бундай мунозаралар тез-тез, кўплаб қонун лойиҳаларида бўлади ва шундоқ бўлиши ҳам керак-да ўзи. Парламент қарашлар ва ғоялар хилма-хиллиги асосида фаолият юритади, ривожланади. Ялпи мажлис шунинг учун ҳам керак. Чунки, қонун лойиҳаси тегишли қўмитада тайёрланиб, ялпи мажлисда муҳокама қилинишидан мурод ҳам маълум камчилик ёки ноаниқликлар ўтиб кетишининг олдини олиш. Бу нормал ҳолат ва парламентдаги доимий ишчи жараён. Бу ҳолат парламент қуйи палатасида ички муҳит ёмонлигини, халқ вакиллари ўртасидаги муносабатлар дарз кетганини англатмайди.
Масалани шундай талқин қилаётганлар, гап бундай. Сиз қонун ижодкорлиги жараёни ҳақида етарли тасаввурга эга бўлмай туриб, нотўғри мулоҳаза юритаяпсиз. Расул Кушербаев тақдим қилган қонун лойиҳаси бўйича муҳокамада сўзга чиққан ва эътироз билдирган барча депутатлар, хусусан, Алишер Қодиров билан ҳам ўзаро дўстона алоқада» — деб ёзган спикер ўринбосари.
