Bugun, 21-iyun kuni Oliy Majlis qonunchilik palatasining navbatdagi yig‘ilishi bo‘lib o‘tdi. Yig‘ilishda “Elektron dalillar bilan ishlash tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi muhokama qilindi.
“Elektron dalil masalasida mutaxassislar savollarimizga qozi sifatida, jinoyat protsessual jihatdan javob berishyapti. Ammo bu yerda texnik yechim berilishi kerak. Hozir elektron dalil orqasida juda katta elektron bazasiga bitta harakat bilan kirish imkoniyati bo‘ladi. Bugun katta kompaniyalar o‘zining ma’lumotlarini, xususan, tijorat siriga oid ma’lumotlarini elektron shaklda saqlaydi.
Qanaqadir arzimas narsa orqali o‘sha elektron bazaga kirish imkoniyati yaratilsa, o‘sha kompaniya bankrot bo‘lishi mumkin. Elektron dalil tashabbuskorlari texnik yechim berishgani yo‘q. Elektron ‘dostup’ga sharoit berdikmi, uning ichidan nimalar chiqib ketishiga hech kim kafolat bermaydi. Biz shoshilmasligimiz kerak.
Mutaxassislar texnik yechim qaysi chegaradan ajratib olinishini aytib berishlari kerak. Hozir mana ozodliksevar deputatimiz Rasul Xidraliyevich o‘zi ham buni bilmayapti-ku, tushunmayapti”, — dedi Alisher Qodirov.
Bunga javoban, Rasul Kusherbayev masalani yaxshi tushunishini aytdi.
“Kechirib qo‘yasiz, men yaxshi tushunib turibman. Qonunni yaxshilab o‘qish kerak. Sizlar o‘qimayapsizlar”, — dedi u.
Alisher Qodirov esa qonunni o‘qiganini tushuntirdi.
“Qonunni o‘qidim. Lo‘lichilik qilmang, eshiting gapimni. Savolga javob berish uchun chiqdingiz bu yerga. Siz savolga javob bering. Texnikmisiz, IT’ni tushunasizmi? Elektron ma’lumot nima ekanligini tushunasizmi? Hech nimani tushunmaysiz. Bitta savolga ham javob bera olganingiz yo‘q”, — dedi u.
Ma’lum qilinishicha, qonun loyihasi avvalgi yig‘ilishda dastlabki muhokamadan o‘tgan. Muhokama yakunida deputatlar qonun loyihasini ikkinchi o‘qishda qo‘mitaga qaytarilishiga ovoz berdi.
Bu holatdan keyin Rasul Kusherbayev Telegram’dagi kanalida post qoldirdi.
“Men haqiqatan ham ozodlikni sevaman va o‘zimni ozod inson deb bilaman. Bu mening eng qadrli boyligim. Menimcha qolganlar ham ozodlikni sevib, o‘zlarini ozod insonlar deb bilishadi, ayniqsa deputatlar. Biz ozodsevarlarmiz” – deb yozgan deputat.
Shuningdek, Qonunchilik palatasi spikerining o‘rinbosari Odiljon Tojiyev ham o’z kanalida holatga izoh berdi.
“Bugun bo‘lib o‘tgan Yalpi majlisda ayni paytda muhokamada bo‘lib turgan “Elektron dalillar bilan ishlash tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi yuzasidan Alisher Qodirov va Rasul Kusherbayev o‘rtasida bahs vujudga keldi.
Parlamentda bunday munozaralar tez-tez, ko‘plab qonun loyihalarida bo‘ladi va shundoq bo‘lishi ham kerak-da o‘zi. Parlament qarashlar va g‘oyalar xilma-xilligi asosida faoliyat yuritadi, rivojlanadi. Yalpi majlis shuning uchun ham kerak. Chunki, qonun loyihasi tegishli qo‘mitada tayyorlanib, yalpi majlisda muhokama qilinishidan murod ham ma’lum kamchilik yoki noaniqliklar o‘tib ketishining oldini olish. Bu normal holat va parlamentdagi doimiy ishchi jarayon. Bu holat parlament quyi palatasida ichki muhit yomonligini, xalq vakillari o‘rtasidagi munosabatlar darz ketganini anglatmaydi.
Masalani shunday talqin qilayotganlar, gap bunday. Siz qonun ijodkorligi jarayoni haqida yetarli tasavvurga ega bo‘lmay turib, noto‘g‘ri mulohaza yuritayapsiz. Rasul Kusherbayev taqdim qilgan qonun loyihasi bo‘yicha muhokamada so‘zga chiqqan va e’tiroz bildirgan barcha deputatlar, xususan, Alisher Qodirov bilan ham o‘zaro do‘stona aloqada” — deb yozgan spiker o‘rinbosari.
Izoh (0)