Фарғонада ноқонуний равишда ер ажратиб бериш эвазига пора сўраган прокуратура ходими ушланди. Бу ҳақда Бош прокуратура матбуот хизмати хабар берди.
Маълум қилинишича, 18 январь куни Фарғона вилояти прокуратураси ДХХ вилоят бошқармаси тезкор ходимлари билан ҳамкорликда тезкор тадбир ўтказган. Тадбир давомида Фарғона вилояти прокуратураси бўлим катта прокурори А.Т. мансаб ваколати доирасига кирмаса-да, фуқаро А.Х.дан унга тегишли бўлган гўшт дўкони орқа томонида жойлашган 1,5 сотих ер майдонини гўёки кадастр ходимлари ёрдамида унинг номига расмийлаштиришни ваъда қилгани аниқланган. Прокуратура ходими хизмати эвзига 1000 АҚШ долларини фирибгарлик йўли билан олган вақтида ушланган.
Шу куни мазкур ҳолат юзасидан Фарғона вилояти прокуратураси томонидан Жиноят кодексининг 168-моддаси 3-қисми «в» банди (фирибгарлик) ва 28, 211-моддаси 1-қисми (пора бериш) билан жиноят иши қўзғатилган.
Гумонланувчи процессуал тартибда ушланган. Тергов ҳаракатлари олиб борилмоқда.
Аввалроқ Андижон прокуратураси ходими 15 минг доллар пора билан қўлга тушгани, Бош прокуратура бошқарма бошлиғининг ўринбосари пора билан ушлангани тўғрисида хабар берилганди.
Мавзуга доир: Ўзбекистонда 2021 йилда қанча мансабдорлар жиноий жавобгарликка тортилгани маълум қилинди
Изоҳ (0)