Италиялик тажрибали мутахассис Карло Анчелотти Бразилия терма жамоасига бош мураббий этиб тайинланди. Бу ҳақда Бразилия футбол конфедерацияси маълум қилди.
Бразилия футбол конфедерациясипрезиденти Эдналдо Родригес бу қарорни қуйидагича изоҳлади:
Карло Анчелоттининг терма жамоага келиши — бу шунчаки стратегик қадам эмас, бу бутун дунёга йўлланган баёнотдир. Биз яна футбол тахтининг чўққисига қайтмоқчимиз. У — тарихдаги энг буюк мураббий, сайёрамиздаги энг кучли жамоаларни бошқарган. Энди биргаликда Бразилия футболи тарихига янги шонли саҳифаларни ёзамиз.
Ҳозирда “Реал”ни бошқараётган Анчелотти мавсум сўнггида мадридликларни тарк этади. Шундан кейин “пентакампеонлар” таркибида иш бошлаши кутилмоқда.
Маълумотларга кўра, Анчелотти 2026 йилги жаҳон чемпионати саралаш босқичининг навбатдаги баҳсларда жамоани бошқаради. Бразилия 6 июнь куни Эквадорга, 11 июнь куни эса Парагвайга қарши майдонга тушади.
Изоҳ (0)