Ўзбекистонда кўп қаватли уйлар олдидаги бўш турган ерлар ободонлаштириш шарти билан аҳолига доимий фойдаланиш учун ажратилади
Ўзбекистон президенти 2021 йил 30 декабрь куни «Атроф-муҳитни муҳофаза қилиш ҳамда экологик назорат соҳасидаги давлат органлари фаолиятини ташкил этиш чора-тадбирлари тўғрисида»ги қарорни имзолади, деб хабар беради ЎзА.
Ҳужжатга мувофиқ 2022 йил 1 мартдан бошлаб давлат органлари, муассасалари ва корхоналари, фуқароларнинг ўзини ўзи бошқариш органлари ва кўп квартирали уй-жойлар мулкдорларига улар эгалигидаги бино ва иншоотларга туташ (чегарадош) бўлган ер участкалари қуйидаги шарт ва мажбуриятлар билан уларга доимий фойдаланиш ҳуқуқи билан ажратиб берилади:
- ер участкаларини обод ҳолда сақлаш;
- дарахтлар, буталар, бошқа ўсимликлар ва ниҳолларни парвариш қилиш ва суғориш;
- йиғиштириш-тозалаш ишларини амалга ошириш ва чиқинди қутиларини ўрнатиш;
- болалар майдончалари, ўтириш жойлари (скамейкалар), тунги ёритиш тизимини ўрнатиш, таъмирлаш ва сақлаш;
- аҳоли учун пиёда йўлакларини барпо этиш, таъмирлаш ва лозим даражада сақлаш.
Ер участкаларини ажратиб бериш вилоятлар ва Тошкент шаҳар ҳокимликлари зиммасига юклатилган. Доимий фойдаланиш ҳуқуқи билан ажратиб бериладиган ер участкаларида белгиланган шарт ва мажбуриятлар бажарилиши устидан назорат ички ишлар органлари жамоат хавфсизлиги хизмати, Миллий гвардиянинг патрулликка жалб этилган бўлинмалари ҳамда экология ва атроф-муҳитни муҳофаза қилиш органлари томонидан амалга оширилади.
Эслатиб ўтамиз, 2021 йилнинг апрель ойида Президент Шавкат Мирзиёев Тошкент шаҳрининг Яшнобод туманига ташрифи давомида ҳудуддаги «Парвоз» МФЙда ҳам бўлиб, маҳалла фаоллари ва нуронийлар билан мулоқотда пойтахтдаги ҳар бир маҳаллага ободонлаштириш учун ўртача 2 миллиард сўмдан маблағ ажратилишини таъкидлаган эди.
Июнь ойида «Gazeta.uz» аҳоли ободонлаштириш ишлари вақтида нималар билан тўқнаш келгани ҳақида ёзган эди: гулзорларнинг бузиб ташланиши, ҳовлиларнинг автотураргоҳ учун майдон қилингани, авваллари яшил ҳудуд бўлган жойларни ва болалар майдончаларининг бетонлаштирилиши, шунингдек, ҳамма жойда аксарият ҳолатларда мантиқсиз равишда баланд қизил-кул ранг бордюрларнинг қўйилиши. Кўп ҳолларда ободонлаштириш ишлари аҳоли билан маслаҳатлашувларсиз ва маблағларни муҳимроқ эҳтиёжларга йўналтириш бўйича уларнинг илтимосларини инобатга олмаган ҳолда амалга оширилмоқда.
Сентябрь ойида Шавкат Мирзиёев ободонлаштириш дастурининг амалга оширилиши бўйича муносабат билдирган эди. «Катта қилиб ярим метрли бордюр қўйяпти. Барака топгур, машиналар пойга ўйнайдими?», — дея сўраган эди у.
2021 йилнинг ноябрида Тошкент ҳокими Жаҳонгир Ортиқхўжаев «Яшил макон» умуммиллий лойиҳаси ва «Обод маҳалла» дастурини амалга оширилишда йўл қўйган қатор хато ва камчиликларни «изоҳлашга сўз йўқ»лигини таъкидлаганди. Ўшанда пойтахт ҳокими Тошкент ҳокимлиги қошидаги Ободонлаштириш бош бошқармаси бошлиғи Санжар Уматовни маҳаллаларни ободонлаштиришдаги камчиликлар учун ишдан олганди.
