Экология ва атроф-муҳитни муҳофаза қилиш давлат қўмитаси бошқарма бошлиғи Азиз Калимбетов АОКАда бўлиб ўтган матбуот анжуманида Ўзбекистонда кузатилган чанг бўронлари ҳақида гапириб ўтди.
«Ўзбекистонда 150 йил давомида биринчи марта кузатилган чанг, қумли бўронни даставвал кўпчилик қурилиш майдонлари сабабли деб тахмин қилди. Бунга қурилиш майдонлари сабаб эмас. Бу чўлдаги қумларнинг шамол орқали кириб келиши ҳисобланади. Бундай чанг бўрони бўлиши учун Тошкент шаҳрининг барча жойлари қурилиш майдонига айланиб кетган бўлиши керак эди», – дейди Азиз Калимбетов.
Шунингдек, унинг қайд этишича, дов-дарахтлар Ўзбекистон бўйича 8 фоизни ташкил этади. Жаҳон стандартига кўра эса кўкаламзорлаштирилган майдонлар 30 фоиз даражада бўлиши лозим.
«2021/2023 йилларда чанг ва газ сўрувчи ускуналарни янгилаш бўйича дастур ишлаб чиқилган ва ишлар бошланган. Ҳозирда 6,5 мингга яқин чанг ва газ сўрувчи ускуналарининг 60 фоиздан ортиғи яроқсиз, сўнгги 10 йилда модернизация қилинмаган», – дейди бошқарма бошлиғи.
Эслатиб ўтамиз, Ўзбекистонга 4 ноябрь куни Урал томондан совуқ ҳаво оқими, у билан бирга кучли шамол кириб келиши оқибатида (шамол тезлиги Тошкентда сониясига 15 метргача, Бухоро, Навоий, Жиззах вилоятларида эса 25 метргача кучайган) мамлакатнинг бир қатор ҳудудларида, хусусан, Тошкент шаҳрида чанг-қум бўронлари кузатилди. «Ўзгидромет» маълумотларига кўра, шу куни соат 21:00-23:00 оралиғида Тошкент ҳавосидаги чанг рухсат этилган миқдордан 30 баробаргача ошиб кетди ва ҳавосининг ифлосланиши даражаси бўйича Ўзбекистон пойтахти дунёда биринчи ўринга чиқди. Чанг 8 ноябрга келибгина чекинди, унгача пойтахт аҳолиси салкам тўрт кутилмаган ноқулайлик гирдобида қолди (масалан, Соғлиқни сақлаш вазирлиги маълумотларига кўра, 5 ноябрдан 6 ноябрь соат 6:00 га қадар тез ёрдамга бўлган 4110 та чақириқдан 709 тасида фуқаролар нафас олиш билан боғлиқ муаммолардан шикоят қилган).
