Volkswagen компаниясининг биринчи электрокроссовери ID.4 Гиннеснинг рекордлар китобидан жой олди. Таъкидланишича, ID.4 битта мамлакат ҳудуди бўйлаб максимал масофани босиб ўтган электромобилга айланган. Рекорд ўрнатиш учун АҚШ танланган бўлиб, автомобиль 48 та штат ва Volkswagen’нинг 628 та дилерлик марказини босиб ўтиб, 56,3 минг километрга яқин йўл юрган. Бутун саёҳат учун қарийб уч ой вақт сарфланган, деб хабар беради Motor.
Volkswagen ID.4 ни узоқ масофага тез ҳаракатланиш бўйича мутахассис Рейнер Ситлоу бошқарган, сураткаш Дерек Коллинс эса унга ҳамроҳлик қилган. 97 кун давом этган сафарда улар таркибига 650 та станция ва 2800 алоҳида терминаллар кирувчи Electrify America қувватлантириш станцияларига 208 марта тўхташни амалга оширган.
Рекорд ўрнатган Volkswagen электрокарининг техник тавсифи ошкор этилмаган, аммо сафар учун сиғими 77 киловатт/соат бўлган батареядан фойдаланилган бўлиши мумкин. У кроссоверга бир марта қувватланиш орқали WLTP цикли бўйича 522 километр йўл босиш имкониятини тақдим этади. Шунингдек, экспресс-қувватлантиргич ёрдамида 320 километрга етадиган қувватни ярим соатда тўлдириш мумкин.
ID.4 нинг саёҳати онлайн кузатиб борилган, унинг ҳаракат нуқтаси ҳар 15 дақиқада янгилаб борилган. Орадан қарийб уч ой ўтгач, электромобил Виржиния штатидаги Херндон шаҳрига қайтган бу ерда унга Гиннеснинг рекордлар китоби вакиллари томонидан сертификат топширилган.
Аввалроқ водородда ҳаракатланувчи Toyota Mirai узоқ масофага юриш бўйича янги рекорд ўрнатгани тўғрисида хабар берилганди.
Изоҳ (0)