Андижонда «Агробанк» ходими 219,5 млн сўмни талон-торож қилгани аниқланди

«Агробанк»нинг Андижондаги туман филиали масъул шахси сохта маълумотлар тайёрлаш орқали 219,5 миллион сўмни талон-торож қилгани аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Департаментнинг Андижон туман бўлими томонидан АТ «Агробанк» Андижон филиалининг мурожаатига асосан ўтказилган терговга қадар текширувда ушбу шахс «Г.А.» МЧЖ раҳбари М.О. билан олдиндан тил бириктириб, 2019—2020 йилларда 9 нафар фуқаронинг хабарисиз уларнинг номига сохта маълумотлар тайёрлаш орқали 129,5 миллион сўм, фуқаро Х.М. билан олдиндан тил бириктириб, 3 нафар якка тартибдаги тадбиркор номига 90 миллион сўм, жами 219,5 миллион сўм имтиёзли кредит ажратиб, ушбу кредит маблағларини шахсий эҳтиёжлари учун сарфлаб, ўзлаштириш йўли билан талон-торож қилгани аниқланган.

Ҳолат юзасидан Жиноят кодексининг 167-моддаси (талон-торож қилиш) 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.

Аввалроқ кредитни талон-торож қилишда гумонланган «Ўзсаноатқурилишбанк» собиқ мансабдорлари айбсиз деб топилгани, уларга нисбатан қўзғатилган жиноят иши тугатилгани ҳақида хабар берилган эди.