Испания чемпионати 7-турининг марказий ўйини Каталония пойтахтидаги «Камп Ноу» стадионида бўлиб ўтади. Унда «Барселона» Мадриднинг «Реал» жамоасини қабул қилади.
«Эль-Класико» номини олган мазкур тўқнашув футбол оламида энг кўп кутиладиган биринчи рақамли ўйин ҳисобланади. Бироқ бу сафарги беллашувни бундай деб аташ бироз ноўриндек. Икки жамоа ҳам қатор муаммоларга эга ва ўз мухлисларини қаттиқ хавотирга солмоқда.
Жамоалар ҳолати ҳақида
«Барселона» бу ўйинга қадар тўртта учрашувда бор-йўғи етти очко тўплай олди. Шунинг эвазига каталонлар мусобақа жадвалининг 9-поғонасида бормоқда. Рональд Куман жамоаси сўнгги турда сафарда «Хетафе»га имкониятни бой берди (0:1).«Реал» ҳам ўз навбатида Примерада бешта ўйин ўтказиб, ўн очко тўплади ва ҳозирча учинчи поғонани эгаллаб турибди. Зинедин Зидан шогирдлари учун ҳам ўтган тур, умуман ортда қолган ҳафта қўрқинчли тушдек ўтди. «Қаймоқранглилар» ўз уйида Ла Лига дебютанти «Кадис»га имкониятни бой бергач (0:1), ҳафта ўртасида «Шахтёр»га енгилди (2:3).
Бу мағлубиятлардан кейин «Реал» футболчиларининг эмоционал ҳолатини кузатиш қизиқ бўлади. Нима бўлган тақдирда ҳам Мадрид шаҳри жамоасига кўплаб тажрибали ўйинчилар йиғилган.
«Барселона»да ҳам ҳаммаси жойида эмас. ОАВда жамоа ички муҳитида ҳали ҳам муаммолар борлиги қайта-қайта янграмоқда. Аввалроқ айрим футболчиларга маош камайтирилган ҳолда янги битимлар таклиф этилгани бошқа ўйинчиларга маълум келмагани ҳақида хабарлар пайдо бўлганди.
Йўқотишлар
Таркибдаги йўқотишларга тўхталадиган бўлсак, Куман бу ўйинда дарвозабон Марк-Андре тер Штеген хизматидан фойдалана олмайди. Хорди Альба эса жароҳатидан фориғ бўлган, бироқ тажрибали ҳимоячи асосий таркибдан жой олмаса керак.«Реал» эса муаммолар етарли. Одатдагидек Эден Азар қайдномада йўқ, ўнг қанот ҳимояси вакиллари Карвахаль ва Одриосола ҳам «Реал»га ёрдам бера олмайди. Шунингдек, Мартин Эдегор ва Мариано Диасда ҳам жароҳат бор.Статистика ва фактлар:
- Бу икки жамоанинг Испания чемпионати доирасидаги ўзаро 244-учрашуви. Ҳозирча ўзаро қарама-қаршиликда мутлақо тенглик кузатилмоқда — 96 тадан ғалаба ва 52 дуранг;
- «Барселона» Ла Лига доирасидаги сўнгги 33 уй ўйинининг 32 тасида мағлуб бўлмади;
- «Реал» Примерада кетма-кет 8 сафар ўйинидан буён ютқазмаяпти;
- Бу класиколар тарихида томошабинларсиз ўтадиган илк ўйин бўлади.
Тахминий таркиблар:
«Барселона»: Нето, Сержиньо Дест, Клеман Лангле, Херард Пике, Серхи Роберто, Серхио Бускетс, Френки де Йонг, Филиппе Коутиньо, Ансу Фати, Антуан Гризманн, Лионель Месси.
«Реал Мадрид»: Тибо Куртуа, Ферлан Менди, Серхио Рамос, Рафаэл Варан, Начо, Каземиро, Тони Кроос, Лука Модрич, Марко Асенсио, Винисиус Жуниор, Карим Бензема.
«Дарё» талқини бўйича тахминий ҳисоб — 2:2.
Ла Лига
7-тур баҳси
24 октябрь, шанба, 19:00
«Барселона» — «Реал Мадрид»
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)