Ҳабиб Нурмагомедов UFC 254 мусобақасида Жастин Гэтжи мағлуб эта олса, промоушен умумий рейтингида етакчига айланиши мумкин. Бу ҳақда UFC президенти Дэйна Уайт маълум қилди.
«Аввал ҳам айтганимдек, бу қарама-қаршилик UFC тарихидаги энг катта жанг бўлиши эҳтимоли бор. Бу жанг нима билан тугаши ҳақида тасаввурга эга эмасман ва айнан шу жиҳат уни интригага бой қилади. Жангчилар қай тариқа ҳаракат қилишини биламиз, бироқ натижа қандай бўлиши ҳеч кимга маълум эмас. Фақат жанг қизиқарли бўлишига кафолат бера оламан.
Жастиннинг сўнгги жангини кўрдингизми? У зерикарли эдими? Бу йигит ўзи қачон зерикарли жанг намойиш қилган? Ҳабибга келсак бу йигит фаолияти давомида нечта раундни бой берган? Битта, иккита? У енгилмас бўлиб қолмоқда, ўйлашимча, агар Ҳабиб шанба куни Жастинни енга олса, вазн тоифасидан қатъи назар жаҳоннинг энг яхши жангчисига айланади.
Жон Жонс ва унинг профессионал муваффақиятлари ҳақида қандай фикрда эканимни жуда яхши биласиз. Бироқ эътибор беринг, Ҳабиб нечта жанг ўтказди ва ўта қийин дивизионда мағлубият нималигини билмай келмоқда. Бу ҳақиқатда ажойиб натижа», — дейди Уайт.
Эслатиб ўтамиз, айни дамда UFC умумий рейтингида ярим оғир вазн дивизиони собиқ чемпиони Жон Жонс етакчилик қилмоқда.
24 октябрь, шанба куни БААдаги «Жангчилар ороли»да UFC 254 мусобақаси бўлиб ўтади. Кечанинг асосий жанги Ҳабиб Нурмагомедов ва Жастин Гэтжи ўртасида кечади.
Мусобақа Тошкент вақти билан 19:30 да бошланади. Асосий жанглар 23:00 дан бошланиши режалаштирилган.
Қайд этиш жоиз, UFC 254 мусобақасининг асосий кардида ўзбекистонлик Лилия Шокирова ҳам иштирок этади. Ушбу мусобақани бу ерда томоша қилиш мумкин — ҳавола.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)