Ўзбекистон фуқаролари ватанга қайтиб келишлари учун қулай шарт-шароитлар яратиш мақсадида Uzbekistan Airways авиакомпанияси 2020 йил сентябрь ойида Россия шаҳарларидан Тошкентга чартер қатновларга эркин сотув очилганини маълум қилди.
Ҳозирги вақтда Москва, Санкт-Петербург, Ростов-Дондан Тошкентга учадиган рейсларга чипта харид қилиш имкони бор.
Россия шаҳарларидан Ўзбекистонга парвоз қилиш фақат Ўзбекистон фуқароларига, ПЗР (полимераза занжир реакцияси) текширувидан ўтганлиги тўғрисидаги маълумотнома (қатнов жўнашидан олдин камида 72 соат амал қилувчи) тақдим этилган ҳолда рухсат берилади.
«ПЗР маълумотномаси бўлмаган йўловчилар авиакомпания қатновларига қўйилмайди», — дейилади хабарда.
Авиачипталарни авиакомпания веб-сайтидан, АЖ мобил иловаси орқали, шунингдек, Uzbekistan Airways’нинг энг яқин сотув офисларидан ёки минтақадаги авиакомпания ташувларини сотиш агентликларидан сотиб олиш мумкин.
Аввалроқ ўзбекистонликларни хориждан олиб келиш бўйича сентябрь ойига белгиланган чартер рейслар рўйхатига қўшимча киритилгани, Япониядаги ўзбекистонликлар 24–25 сентябрь кунлари чартер репатриация рейси билан ватанга қайтарилиши режалаштирилгани, Uzbekistan Airways Деҳлига чартер рейс амалга ошириши тўғрисида хабар берилган эди.
Эслатиб ўтамиз, 12 сентябрь куни Ростовдан 837 нафар, Екатеринбургдан 800 га яқин ватандош поездда Ўзбекистон томон йўлга чиққан.
Изоҳ (0)