Коронавирусга қарши курашиш штаби аъзоси Севара Убайдуллаева COVID-19 билан касалланганлар беморлар шифокорлар билан маслаҳатлашмасдан осма укол олаётгани уларнинг аҳволини янада оғирлашишига сабабчи бўлаётганини маълум қилди.

Кадр: YouTube

«Одамлар ‘Олдин шамоллаганимда осма укол (капелницалар) олгандим, яна бир марта олсам, ўтиб кетади деб ўйладим’ дейишади. Касалликнинг 6-7-кунига бориб, уларнинг аҳволи оғирлашишни бошлаяпти. Томографияга тушишяпти, ўпканинг жароҳатлангани, сув йиққанини кўришяпти. Бу даврда энди биз амбулатор шароитда ёрдам беролмаймиз. Осма уколлардан кейин, касалликнинг 5-6-кунида ўпка суюқлик йиғишни бошлаяпти, ўпка шиши келиб чиқяпти. Ҳозирги кунда ўлаётган беморларнинг ҳамма ташхисини кўринг: ўпка шишиши! Булар ўз-ўзидан келиб чиқмаяпти. Ҳаммаси осма укол таъсири», — дейди эксперт.

Шунингдек, Севара Убайдуллаеванинг таъкидлашича, беморлар буйраги суюқликни чиқариб ташлашга улгурмаяпти. Бу юрак қобиғида ҳам суюқлик йиғилишига олиб келиши, жигарни ишдан чиқариши мумкин.

«Осма укол олишдан аввал, албатта, шифокор билан маслаҳатлашинг. Одамлар осма уколлардан воз кечса, Ўзбекистонда ўлим кўрсаткичи камаярди», — дейди Коронавирусга қарши курашиш штаби аъзоси.

Аввалроқ коронавирус енгил кечаётган беморларга кўп дори тайинлаш ўринсиз экани таъкидланганди.

Аввалроқ Коронавирусга қарши курашиш штаби аъзоси Барно Одилова венага томчилатиб қилинган уколлар (капелницалар) қилиш муолажалари натижасида нафақат ўпкада зотилжам, балки суюқликнинг бирданига кўп миқдорда юборилиши оқибатида ўпка шишиши ҳолатлари ҳам кўп кузатилаётганини қайд этганди. Антибиотик ва вирусга қарши препаратларни билиб-билмасдан қабул қилиш орқали организмга бефойда таъсирини қўзғаш, асоратларига учраб қолиш хавфини юзага келтириши яна бир бор таъкидлаганди.

Эслатиб ўтамиз, аввалроқ Ўзбекистонда 5 июлдан бошлаб коронавирусга чалинган айрим тоифа беморлар ўз уйида даволаниши мумкинлиги, шифохоналар ва уйда даволанаётган касаллик аломатларсиз енгил шаклда кечаётган беморлар 10 кун муддатда клиник белгилари кузатилмаган тақдирда назоратдан чиқарилиши, уй шароитида даволанаётган беморлар ҳамда карантинга олинган шахсларга жойига чиққан ҳолда тиббий ёрдам кўрсатишга ихтисослашган мобил гуруҳлар ташкил этилиши хабар қилинган эди.