Ортиқча вазнга эга аёллар кийиниш услубида йўл қўядиган 6 та хато

Ортиқча вазндаги машҳур аёллар ҳамда юлдузлар ҳар қандай қомат эгалари замонавий кўрина олиши мумкинлигини ўзларининг тажрибалари орқали исботлаган. Тан олиш керакки, айрим аёллар қоматларининг имкониятларидан бехабар ҳолда либос танлаш жараёнида хатога йўл қўяди. Келинг, бундай камчиликни қандай бартараф этиш ва ўлчамингиздан қатъи назар урфга монанд кўриниш яратишингиз ҳақида гаплашамиз.

Сиз фақат қора рангдаги либосларни киясиз, чунки улар «озғин кўрсатади». 

Афсуски, қанча аёллар ушбу қоидага амал қилиб, гардеробларини қоронғиликка кўмади?! Аслида нозикроқ кўриниш рангга эмас, балки матонинг сифати ва либоснинг тўғри бичилганига боғлиқ. Ҳар қандай мавсумда кийилаверадиган қора тусдаги либослар бора-бора ташқи қиёфангизда тушкун кайфиятни пайдо қилади. Бу билан нафақат ўзингиз, балки атрофдагилар ҳам зерикиб кетади. Шунинг учун ҳам кундалик либослар орасига кўпроқ ёрқин рангдагиларини қўшишдан чўчиманг. Кийим танлашда ранглардан аввал унинг сифатига эътибор қаратишга одатланинг.

Кенг бичимдаги кийимларни маъқул кўрасиз

Ортиқча вазнга эга аёллар орасида ўта кенг бичимдаги либосларга эҳтиёж катта. Бу ҳам уларнинг навбатдаги хатоси, албатта. Ушбу услуб сизнинг ташқи кўринишингизни шаклсиздек кўрсатади, ҳажмни янада бўрттиради. Энг яхшиси, ўзингизга мос ва қулай бўлган кийимларни харид қилинг. Кенг ва ўлчами катта либосларни уй шароитида кийиш мақсадга мувофиқ.

Ўлчамингизга тўғри келмайдиган кийимларни танлайсиз

Ўлчами кичик ва матоси дағал либослар жиддий ноқулайлик туғдириши табиий. Бу орқали қоматдаги камчиликлар аниқ акс этади ва либосда бурмалар ҳосил қилади. Ҳар қандай инсон ўз ўлчамига мос келадиган либос танлаши нафақат ўзига бўлган ишончни орттиради, балки мукаммал силуэт яратишга ҳам ёрдам беради.

Безакларга ҳаддан зиёда ружу қўйгансиз

Кийимга кўрк бағишловчи ҳар қандай безак сизнинг фойдангизга ишлаши керак. Унутманг, улар ноқулайлик туғдирмаслиги лозим. Аксинча бўлса, бундай безаклардан дарҳол воз кечинг. Агар жозибалироқ кўринишни истасангиз, ранглар билан ишлашга одатланинг.

Аксессуарларга эътибор бермайсиз

Аксарият аёллар аксессуарларнинг образдаги ролига етарлича аҳамият бермайди. Камар ёки заргарлик буюмлари сизнинг гўзаллигингизни таъкидлашга ёрдам бериши мумкин. Айниқса, бўйингиз янада баландроқ кўринишини истасангиз, тақинчоқларнинг узунларини тақишингиз керак. Либос рангига мос белбоғ эса сизни янада жозибали кўрсатади.

Кучли томонларингизни билмайсиз

Аёллар кўпинча камчиликларни кийим билан яширишга ҳаракат қилавериб, ўз афзалликлари ҳақида тамоман унутиб юборади. Кўзгуга боқинг! Ўзингизга ишонинг! Кучли томонларингизни аниқланг! Ташқи кўриниш хоҳ келишган, хоҳ бесўнақай бўлсин ҳеч нарсани белгиламайди. Муҳими, сизнинг ички оламингиз гўзал, хулқингиз мукаммал бўлсин!