Қорақалпоғистон Республикаси Беруний туманида бир гуруҳ фуқаролар сув танқислигидан норози бўлиб, Нукус—Тошкент магистрал йўлини тўсиб қўйди. Бу ҳақда Telegram’даги «Қорақалпоқ24» канали хабар берди.
«Xabar.uz»нинг ёзишича, норозилик Беруний туманининг кўпгина қишлоқларида аҳоли томорқасини суғориши учун сув танқислиги кузатилаётгани сабаб юзага келган. Натижада томорқага экилган экинлар жазирама иссиқда қовжираб қурий бошлаган.
«Айрим маҳаллаларда эса одамлар ‘качалка’ қудуқлардан ичимлик суви истеъмол қилади. Қорамоллар эса ариқлардаги сувдан суғорилади. Сув келмай қўйгач, айрим хонадонларда чорва молларининг касалланиш ҳолати кўпайган», — дейилади хабарда.
Фуқароларнинг бир неча соат давомида Найман кўприги яқинида магистрал йўлни тўсиши натижасида узундан узоқ тирбандлик ҳосил бўлган. Воқеалар ривожи ҳақида аниқ маълумотлар мавжуд эмас.
Эслатиб ўтамиз, 2019 йилнинг ноябрида Нукусда одамлар ҳудудни табиий газ билан таъминлаб беришни талаб қилиб, норозилик намойиши ўтказган эди.
Изоҳ (0)